Shillong Naitung 30: U Symbud Myntri Rangbah ka Jylla, u Bah Prestone Tynsong, ula plie ia u mawsahnam jong ka jingrakhe ia ka Jubili Rupa jong ka Balang Presbyterian jong ka District Krang kaba la pynlong ha ka ïingmane jong ka Balang Presbyterian Krang hynne ka sngi.
Ha kane ka jingrakhe la iadonlang u MLA bad MDC ka Sohiong u Bah Synshar Kupar Roy Thabah, u MLA barim ka Sohiong u Bah Samlin Malngiang, u MDC barim u Bah Sherbor Mawlong, u Rev TS Mawlong, u Rev JR Thabah, ki pastor, ki tymmen basan bad kiwei kiwei.
Haba kren ha ka jingialang u Bah Prestone ula ong, ka sorkar ka kwah ban iatreilang bad ban iaid ryngkat lang bad ki Balang bapher bapher la ka long ha ki prokram, ki projek ne ki polisi treikam jong ka sorkar bad lyngba kane ka jingiatreilang yn lah ban poi sha man la ki thliew iing.
U Bah Prestone ula ai jingmut ia ka Balang ba ia ka projek kaba ka thmu ban tei kadei ban ai kyrteng da ka Youth Centre bad ka Balang kadei ban pynbiang ia ki jingthoh ban ioh ia ki jingiarap na ka Sorkar Jylla.
“Kum ka dak ban iasnohktilang, nga kular ba na ka liang jongka Sorkar Jylla kan ai jingiarap T.25 Lak ban tei ia kane ka projek bad ngi kwah ba lyngba kane ka jingai ka jong ngi, kane ka projek kan long ka jingkyrkhu ia ki 9 tylli ki Balang bad ia kane ka thain hi baroh kawei” ong u Bah Prestone.
Ula ong, ynda lah dep shna ia ka Youth Centre yn ioh ban pynlong ia ki jingai jinghikai ki bapher bapher bad ia ki jingai jingpynsngewthuh ia ki samla bad ia ki longkmie.
