Shillong, Naitung 30: Ka Sorkar Jylla kala plie iaka lad ban ïamir jingmut shuh shuh ban weng ïa ki jingsngewkhia jong ki paidbah halor ka projek Shillong Ropeway, ong u Myntri ka tnat Tourism Timothy D Shira haba pynskhem ba baroh ki jingbit (Permission) ba donkam na ka bynta kane ka projek la dep ban ïoh.
Haba jubab ia ki jingsngewkhia halor ka jingkynnoh ba la pom dieng pathar bad ka sdang tyrkhong ki tyllong um, u Timothy u la ong ba ia kane ka projek la sdang ha ka por ba um pat long Myntri ka tnat Tourism bad naduh mynshwa la bud ryntih iaki kyndon haba sdang iaka Project.
“Iaka Project la sdang hashuwa ba ngan shimti iaka tnat Tourism. Ngam tip haduh katno kane ka Project kala iaid shakhmat hynrei na ka liang ka tnat, kala pyntip ïa nga la sdang iaka Project daka ba bud ryntih iaki kyndon bad la ïoh lut ia ki jingbit (Permission) aroh kiba donkam na ki bor ba dei peit,” u la ong.
Halor ka jingdonkam ban khot jingialang biang, u Myntri u la ong ba ka Sorkar ka kloi ban iakren bad baroh kiba don bynta ha kane ka Project.
“Ka jingïamir jingmut kan long lada don eiei. Nga pyrkhat ba ka long kaba donkam ban pynduh ïa kine ki jingsngew artatien baroh, bad teng teng ka jingbym ïasngewthuh jingmut bad ka jingbym don jingtip ruh kumjuh. Kata ka donkam ban pynbeit. Dei ban pyniadei bad kiba sngewkhia lane kiba ju kynthoh bad ong ba ka Sorkar kam shym la leh hok ïa ki kam. Ngi donkam ban ia pynbeit bad baroh kiba sngewkhia” ula ong.
U Myntri ula iathuh ba la ioh ia ka jingmynjur naka tnat Forest hashuwa ban sdang iaka Project.
“Nga tharai ba ïa ka kam la sdang haka por u Myntri ka tnat Tourism barim. U la iamir jingmut bad baroh lyngba ka tnat, bad ki ophisar jong ka tnat ki la leh ïa kaei kaba donkam shwa ban sdang ïa ka kam. La ïoh ruh ïa ka jingmynjur naka tnat Forest kumta kaei kaba dang sah”. ula bynrap.
 ba donkam na ka bynta kane ka projek la dep ban ïoh.){kind=link}