Shillong, K’Lyngkot 28: Ka Sonapyrdi Tourism and Economic Development Society (STEDS) ha ryngkat ka jingiatreilang bad ka Dorbar Shnong kala pynbna ban pynlong ia ka Lukha Festival 2023 naduh 3 haduh 4 tarik u Rymphang 2023 kum shi bynta ban pynneh iaka wah bad ban kyntiew iaka kam jngohkai pyrthei.
Haba kren sha ki lad pathai khubor u president ka STEDS u bah K. S Suchiang u la ong ba ha kine ki arsnem ba ladep, ka Society kam shym la ioh lad ban pynlong ia ka Lukha Festivals na ka daw ka jingwan lynshop ka khlam COVID-19.
U bah Suchiang ula pynpaw ba ka jingthmu bad jingangnud jong kane ka Society ban pynlong ia kane ka Festival kadei ban hikai iaki paidbah halor ka jingdon kam ban pynneh pynsah ia ka mei mariang khamtam iaka Wah Lukha bad iaka Narpuh Wildlife Sanctuary kaba don hapoh ka Narpuh Elaka.
“Ka jingpynlong ia ka Lukha Festival ka long shibynta ban pynpaw bad ban kyntiew ia ki jingling kyrpang ki ba don ha kine ki jaka bad kumjuh ruh ban kyntiew iaki kam jngohkai pyrthei kan wanrah ia ka iohkam iohjam ia kito ki briew ki ba shong ba sah ha kitei ki thaiñ” la ong u bah Suchiang.
U bah Suchiang ula iathuh ba haka 3 tarik Rymphang kan don ka jingiakop ia jngi, kienglieng, iakop shondur, ialehkai phutbol harud wah bad ka jingiakop thei bhabriew lane ka Miss Lukha 2023.
Ula iathuh ba haka 4 tarik Rymphang kan don ka jingiakop drodur, Trekking bad kin don ki nongtem nongpud kynthup ka kynhun Snow White bad u DJ wanshan bad nalor kiwei kiwei de.
