Agartala, K’lyngkot 30: Ka liang pyrshah Congress kaba la iatehlok bad ki Left party ba la ialam da ka CPIM ha ka sngi Saitjain ba la lah ka la pynbna ia ki 17 ngut ki kyrtong ki ban ia aireng ha kane ka ilekshon assembly ha Tripura kaba don 60 tylli ki seat ka ban long ha ka 16 tarik u Rymphang u ban wan.
Ki santylli ki left party ba la ialam da ka CPI-M ki la pynbna ia ki 43 ngut ki kyrtong jong ki ha kane ka sngi Balang ba la lah, da kaba iehnoh ia ki 13 tylli ki seat na ka bynta ka paralok bathymmai jong ki ka Congress bad weng noh ia ki 8 ngut ki sitting MLA.
Ki nongialam ka congress kiba la pynpaw ia ka jingsngew buhkhoh ha kaba iadei bad ka rukom bhah ia ki seat na ka bynta jong ki da ki left party ki la kyntait ban kynthoh ei ei halor kane ka list jong ki kyrtong.
Haba pynpaw ka jingsngew buhkhoh u nongialam ka congress uba dei ruh tang ma u, u MLA ba marwei jong ka party, u Sudip Roy Barman u la ong ba ha kaba nyngkong ki la dawa 27 tylli ki seat, bad hadien 23 ki seat na ki left party.
“Ki la shim ia ka rai katkum ka jingsngewbit ka jong ki, ngin leit katkum ka mon jong u paidbah, ” Ong u Barman.
Katkum ka list ki kyrtong ka seng Congress ia kaba la pynbna da u Central Election Committee General Secretary ka party u Mukul Wasnik, u Roy Barman un iakhun ban shah jied biang na Agartala constituency katba u president ka party ka jylla u Birajit Sinha un ia aireng na Kailasahar, kata ka thain kaba u la shah jied kham hashwa sha ka dorbar assembly.
U president barim ka Congress ka Tripura u Gopal Roy un ia aireng na Banamalipur seat, katba u MLA barim u Ashish Kumar Saha un iakhun ban shah jied biang na Bordowali seat.
