Shillong, Risaw 28: U Principal Secretary ka tnad ka koit ka khiah ka Jylla Meghalaya Sampath Kumar hynne ka sngi Nyngkong, u la pyntip ba ka Sorkar Jylla kan sa kyntiew kyrdan noh ia kumba 2000 tylli ki Anganwadi sha ki Early Child Development Centre (ECD).
Ha ki 2 snem ban wan, ka Sokar Jylla kan kyntiew kyndan ia kumba 2000 tylli ki Anganwadi Centre shaki ECD Centre lyngba ka tnat Community Rural Development da ka jingiarap pisa na ka Asian Development Bank (ADB).
Kane ka jingkyntiew kyrdan ia ki Aganwadi centre sha ka ECD centre ka dei shibynta jong ka Early Child Development Mission jong ka Sorkar Jylla.
“Ngi don ki prokram kiba heh ban kyntiew kyndan ne ban pynkylla dur ia baroh ki Aganwadi Centre kum ki ECD ban pynlah ia kine ki jaka ban ai jinghikai kaba kham bha ia ki khynnah, ki longkmie kiba armet bad ki longkmie kiba ai buin” ong u Sampath Kumar.
U Kumar u la ong ba kane ka projek ka kynthup ia ka jingpyniasoh lang ia ki prokram bapher bapher hynrei ka jingthmu jong ka ka long eh ban ai jinghikai, ka jingkyrshan kaba kham bha ia ki khynnah bad ki longkmie kiba armet bad ki longkmie kiba ai buin.
“Ngi la iakren bad ki katto katne ki Architect ba pawnam ban pyrkhat shaphang ka jingpynwandur thymmai iaki ECD ba kin lah ban ai ïa ki jinghikai, ki jaka pule kaba kham bha” u la ong.
Nalor kane u Principal Secretary u la iathuh ba ka tnad ka koit ka khiah ka la iatehlok ruh bad ka IIT Bombay na ka bynta ban ai jinghikai ia ki longkmie halor ki buit ai buin khun kiba treikam bha katkum ki juk stad saian (Scientific).
U la iathuh ba kane ka Program kala sdang haki katto katne ki jaka hapoh ka Jylla bad haduh mynta ki don 40 ngut kiba la ioh jinghikai naka IIT Bombay.
“Ka IIT Bombay ka wad bniah iaka rukom ai buin katkum ka juk stad mynta (Scientific) bad kala sdang ban ai jinghikai iaki nongsumar, iaki longkmie ba ki don ki buit bapher bapher halor ka rukom ai buin, ka ban lam sha ka jingkiew ka jingkhia jong u khunlung” u la ong.
U la bynrap ruh ba ka IIT Bombyt ka hikai ruh kumno ban buddien ia ka jingheh jingsan jong u khunlung, khnang ba ki khunlung kin ym don ki jingeh ha ka heh ka san namar lada ithuh ia ki jingeh jong ki ha ka heh ka san da lah slem por kan sa kylla long sinew ha ka liang ka jingduna ha ki dkhot met, ha ka liang ka jingeh ha ka jingpule bad kiwei kiwei.
“Haba phi lah ban ithuh ia ki jingeh ha ka jingheh jingsan jong u khunlung ha ka por ba dang rit phi lah shisha ban iarap ia u khunlung ban jop ia kita ki jingeh” u la bynrap.
