Shillong, Jylliew 11: Ka Kong Bindas Syiem, hynne ka sngi Ba-ar, kala pynbna ban weng noh iaka jingshah thngan ba khlem pud hadien ba ka la ioh ka jingkular naka Sorkar ba kan sa shna noh iaka surok Nongpoh-Umden-Sonapur.
Ia kane ka rai ka Kong Bindas kala pynbna hadien ba wai ka jingialang bad u Symbud Myntri Rangbah ka Jylla Bah Prestone Tynsong uba khmih iaka tnat PWD (Road) ka Jylla.
“Nga pynpaw ka jingsngewkmen bad ka jingsngewnguh kaba khraw iaka Sorkar kaba la pynsngap iaka jingdawa jong nga ban maramot bad shna pynbha iaka surok Nongpoh-Umden-Sonapur” ong ka Kong Bindas.
Ka Kong Bindas kala ong “Nga la ioh ka jingkular (Assurance) kaba biang haka ba ka Sorkar kala ai katkum ka jingkwah jong nga”.
Nalor kane ka Kong Bindas kala ai khublei ia baroh ki paidbah kiba la wan kyrshan haka jingshah thngan kaba ka la shim naka bynta ka bha ka miat u paidbah.
Lah ban kdew ba kane ka dei ka sngi kaba 5 baka Kong Bindas Syiem ka la shah thngan ha jaka ieng kali ha Additional Secretariat Shillong, ban dawa maramot iaka surok Nongpoh-Umden-Sonapur.
Haka jingialang bad u Symbud Myntri Rangbah, iaka Kong Bindas la synranlang daki nongialam ka KSU North Khasi Hills, HYC, HITO, Seng Samla Umden bad Synjuk Rangbah Shnong Ri-bhoi district.
