Shillong, Naiwieng 25: U General Secretary ka HYC u Bah Roykupar Synrem ula pyntip ba ka kynhun ki sengbhalang hapoh ka lama jong ka “Save Hynniewtrep Mission” kin pynlong iaka jingthang ia ki tyngshop jong u Myntri Rangbah ka Assam bad Meghalaya bad jong u Myntri Kam Pohiing ka ri India u Amit Shah kum ka dak ban pynpaw ia ka jingpyrshah bad pynrem halor ka jingjia ha Mukroh, West Jaintia Hills.
Ula pyntip baka jingthang ia ki tyngshop jong u Conrad K Sangma, Himanta Biswa Sarma bad u Amit Shah yn pynlong ha Sor Shillong ha ka sngi Saitjaiñ ha ka por 2 baje nohphai sngi.
U Bah Roykupar ula pynpaw ba ki mat jingdawa jong ka ka kynhun ki sengbhalang, ka long ba ka Sorkar Meghalaya kadei ban kem mardor ia ki pulit bad ki Forest Guards kiba donkti ha ka ban siat iap ia ki paradoh parasnam bad ia ka case bad ka jingbishar dei ban leh hapoh ki ïing Kashari jong ka jylla Meghalaya ym ha Assam.
“Ngim dei ban shu hun tang ba ka Sorkar India ka pdiang ia kata ka jingdawa jingtohkit da ka CBI hynrei ki kam ba iadei bad kane ka jingjia baroh dei ban leh hapoh ka Jylla Meghalaya. Ngi dawa ruh ba ka Sorkar Meghalaya ka dei ban pynkiew ia ka song pisa jingiarap ia ki longïing kiba lah mad ia kane ka jingjia ba sngewsih” la pynpaw u nongialam ka HYC.
Ula iawer ia ki paradoh parasnam ka Jaidbynriew ba kin ia wan snohktilang bad kane ka Prokram kum ka dak ka jingpynrem ia katei ka jingjia bad ban kyntu ia u Conrad Sangma, u Himanta Biswa Sharma bad u Amit Shah ba kidei ban shim ia ka jingkitkhlieh namar kine baroh kin nym jia lymda dei ba kine ki bor Sorkar ki shim sting bad leh kamkai halor ka mat jingia kajia pud hapdeng ka Jylla Meghalaya bad Assam.
