Shillong, Lber 20 : Ka seng Hynniewtrep National Youth Front (HNYF)-Soutthern Border, kala pynbna ia ka rai ba kan kyndang noh naphang ia ki skul sna-iap kiba don ha khappud ka Mawsynram bad Ranikor C&RD Block bad kumjuh ruh ia ki nonghikai skul sorkar kiba ai bylla nong ia ka kam lajong sha kiwei pat ki briew.
Ka HNYF-Southern Border kala shim ia kane ka rai hadien ka jingiohi ia ka jingktah ka jingdon jong ki skul sna-iap ia kiwei pat ki skul kiba trei hok ban shakri ia ki khynnah ka thain bad ruh ka jingshah ktah ki khynnah na ka jingleh mon ki nonghi kai kiba ai nong ia ka kam lajong sha kiwei.
Haba kren sha ki lad pathai khubor, u President ka seng Bah Kyllang Shngain Thongni ula ong “Ngi tip bha ia ka jingdon jong ki skul sna-iap ha ka thain, kiba don tang ka kyrteng hynrei ki bym shym treikam bad shu bam ei tang ka tulop”.
Ula ong ba ka seng HNYF-Southern Border kan sa leit ban kyndang noh ia kine ki skul bad ban dawa na ki bor ba halor ba ki dei ban pynduh jait noh ia ki.
Kumjuh ruh u Bah Kyllang ula ong “Ha ka thain khappud jong ngi, ki don ruh ki nonghikai skul Sorkar ki bym ju leit sha skul da ki snem hynrei kila ainong sha kiwei ban hikai ha ka jaka jong ki katba ialade pat ki shu bam suk ia ka tulop sorka””.
“Ka jingleh kine ki nonghikai kala ktah bha ia ki khynnah skul namar ki briew ba ki ai nong kim pat dei satia kiba biang ka kyrdan ne bala ioh ia ki jinghikai pyntbit kumba ioh da ki nonghikai skul na ka por sha ka por” ula ong.
U Bah Kyllang ula ong ba ka Sorkar manla ka por ka ju phah ia ki nonghikai ban leit hikai pyntbit khnang ba kin lah ban ai ka jingshakri kaba paka ia ki khynnah skul kat kum ka jingiaid jong ka por.
“Kine ki Nonghikai ki ju leit sha ki training ba phah ka Sorkar hynrei sepei ka jingleit pyntbit jong ki namar kim ju leit mih sha skul da kaba ai pateng sha kiwei ba kin hikai ha ka jaka jong ki” ula kynnoh.
Kat kum ka jingong jong ki, ka jingdon jong ki nonghikai kiba ai bylla ia ka kam lajong sha kiwei ka kham bun eh ha ki skul kiba don ha khappud khamtam ha ki shnong ba sah ki jaitbynriew Garo, Hajong, Myndai bad kiwei kiwei.
Ka seng HNYF-Southern Border kala rai ba kan sa phah da ka jingthoh sha ka Tnad Pule Puthi bad kumjuh ruh sha u Myntri ka Tnad Pule Puthi ban pyntip ia ka jingdon kine ki skul bad ki nonghikai khnang ba kin leh eiei.
-Soutthern Border, kala pynbna ia ka rai ba kan kyndang noh naphang ia ki skul sna-iap kiba don ha khappud ka Mawsynram bad Ranikor C&RD Block bad kumjuh ruh ia ki nonghikai skul sorkar kiba ai bylla nong ia ka kam lajong sha kiwei pat ki briew.){kind=link}