Shillong, Risaw 15 : Ka Election Commission of India (ECI) ha ka sngi Ba-ar, kala pynbna ba ka elekshon shiteng samoi jong ka Gambegre Constituency, kan long ha ka 13 tarik Naiwieng.
Ka ECI kala pynbna ia kane ha ka jingiakynduh ia ki lad pathai khubor hynne ka sngi ha Vigyan Bhawan, New Delhi ban pynbna ia ka elekshon ka Maharashtra bad Jharkhand.
Ka pyntip ba ka elekshon Legislative Assembly ha Maharashtra kaba don 288 seat), kan long shisien long ha ka 20 tarik Naiwieng katba ha Jharkhand kan long ha ki artylli ki phase kata ka phase-I ha ka 13 tarik Naiwieng bad ka phase-II kan long ha ka 20 tarik Naiwieng.
Ka jingniew ia ki vote jong kine ki elekshon kynthup ka Gambegre, kan long ha ka 23 tarik Naiwieng.
U Chief Electoral Officer (CEO) ka Jylla BD Tiwari ula pyntip “Ki bor sorkar kila pynkhreh lut nadong hadong ban pynlong ia kane ka elekshon kaba khuid, ka bym shah liang bad kaba iaid beit iaid ryntih”.
Ula pyntip ruh ba ka Election Commission kala pyntreikam mynta ia ka Model Code of Conduct ha West Garo Hills namar kane ka elekshon shiteng samoi ha Gambegre. Kane kan treikam ia baroh ki kyrtong, ki seng sain pyrthei bad ka Sorkar Jylla.
Ka Gambegre ka don haduh 32,254 vote ba kynthup ia 16331 ngut ki shynrang bad 15923 ngut ki kynthei, 3 ngut ki service voters, 64 ngut ki tynmen, 100 ngut ki briew ba don jingduna dkhot met.
Napdeng ki 51 tylli ki Polling Station, 31 tylli la ithuh ba ki dei kiba don jingma bha.
Ia ka elekshon shiteng samoi ha Ganbegre la pynlong namar ka jingiehnohkam jong u MLA ka Congress Saleng A Sangma hadien ba ula shah jied kum u MP ka Tura.
Na ka liang ka NPP kala pynieng ia ka kurim u Myntri Rangbah ka Jylla ka Mehtab Chandee A Sangma katba ka TMC kala pynieng ia ka MDC Sadhiarani M Sangma kaba dei ka kurim u MLA barim Zenith M Sangma bad para kynsi u Dr Mukul Sangma.
Ka Congress ka lah ban pynieng ia u Jingjang M Marak uba dei u paralok ba iajan bha bad u MP ka Tura Saleng Sangma.
 ha ka sngi Ba-ar, kala pynbna ba ka elekshon shiteng samoi jong ka Gambegre Constituency, kan long ha ka 13 tarik Naiwieng.){kind=link}