Udalguri, Jylliew 17: Ka Seng All Bodo Students’ Union (ABSU) hapoh Assam ka la dawa na ka sorkar pdeng ba kan pynbna ia ka jingjia jong ka jingshlei um ha ka jylla kum ka jingjia shah pynjulor ba shyrkhei hapoh ka ri (National Disaster).
Nalor kata ka ABSU ka la dawa ruh na ka sorkar pdeng ba kan mang T. 20,000 klur na ka bynta ban tei bad pynbha pat ia ki jingjulor ha ka jylla.U President ka Seng u Dipen Boro kumjuh u General Secretary u Khanindra Basumatary ki la kyntu ia ka sorkar pdeng ba kan pynbna ia kane ka jingshlei um ha Assam kum ka jingshah pynjulor ba triem hapoh ka ri.
Kine ki nongialam ka ABSU ki la ong ruh ba ka jinglong jingman na ka jingshlei um ka la nang hiar arsut namar ka jingther jong u ‘lapbah naduh kine ki khyndiat sngi ba la dep.Ki la ong shuh shuh ba ki ba kum ki jingjia shah pynjulor ha ki bor ka mariang kum ki jingshlei um, ki jingtwa khyndew ki la wanrah ka jingjulor ka ba shyrkhei ia ki iing ki sem bad kiwei pat ki jingtei.
Kumta ruh ka ABSU ka la kyntu ia ka sorkar pdeng ba kan mang mardor T. 20,000 klur na ka PM Relief Fund bad ban pyntreikam ia ki lad jingiarap ba kyrkieh.Shuh shuh ka la dawa ruh na ka sorkar pdeng ba kan phah ia ki kynhun aijingiarap ba kyrkieh na ka bynta ki kam pyllait im bad ki kam aijingiarap sha kito ki jaka ki ba la shah ktah jur ha kane ka jingshlei um ha ki bynta bapher bapher ka Assam.
Kane ka seng ki samla pule ka la phai khmat ruh sha u myntri rangbah ka jylla u Himanta Biswa Sarma bad sha u chief executive member (CEM) ka BTR, u Pramod Boro na ka bynta ban phah ia ki myntri sorkar bad ki executive member bad ki MCLA ba kin leit jurip bad bishar halor ki jingduh jingsat ha kito ki thain ka BTR ki ba la shah ktah ha ka jingshlei um.
