Shillong, Jylliew 17: U Myntri ka Tnad Disaster Management ma Kyrmen Shylla, hynne ka sngi thohdieng, ula leit sngewlem bad iakynduh ia ka Longiing kaba la duh noh ia 4 ngut ki Khun ha ka jingtwa khyndew kaba jia hynnin ka sngi palei ha ka Shnong Laitlarem, kaba hap hapoh ka Mawphlang Block, East Khasi Hills District.
U Myntri ula pynpaw ia ka jingsngewsih ryngkat bad kane ka longing bad ong ruh ba kane ka jingwan jong u ka long ban iadon ryngkat bad kane ka Longiing kaba mad ia ka jingjia ba sngewsih tam.
“Nga kloi ban leh kat kaba lah ban iarap ia kane ka Longiing bad ban iadon ryngkat bad kane ka Longiing ha kum kane ka khep ba sngewsih kthang” ula ong.
“Nga la sakhi haba wan sha kane ka shnong ba ki surok kila shlei um lut bad bun ki jaka kila shah tap ha ka um. Nga kyrpad ia ki paidbah ka Jylla ba kin phikir bha ialade haba ki leit ki wan” ula bynrap.
U Myntri ula kular ruh ia kane ka longiing ba ka Tnad kan pyrshang kat kaba lah ban pynkloi noh ia ki song jingiarap da ka pisa khnang ba kane ka Longiing kan ioh ban pyndonkam.
Ki 4 ngut ki khynnah kiba iap ha kane ka jingtwa khyndew ki kyrteng u Wanlambiang Kharmyndai ba 9 snem, u Ibanlumlang Kharmyndai ba 6 snem, I Ribhalin Kharmyndai ba 4 snem bad I Daphi Banri Kharmyndai ba 8snem, iba la khlad ha lynti ban poi sha ka jaka sumar ha Sohiong CHC.
U Myntri ula pynbna ruh ha kane ka jingleit sngewlem ha Laitlarem, ba ka Sorkar kan ai ia ka song jingiarap ba mar 4 lak sha kine ki lanot ba khlad ha kane ka jingjia.
