Shillong, Sept 19: U Myntri Rangbah ka jylla Conrad K Sangma ha ka sngi Palei, u la pyllait paidbah ia ka ‘Guidelines for Monitoring Childhood Development (GMCD) Tool’ na ka bynta ka Early Childhood Development (ECD) ha ka jylla Meghalaya.
We are delighted to unveil the Guide for Monitoring Child Development (GMCD) Tool in Shillong, a collaborative effort with Ummeed CDC.
Our Early Child Development Mission has been guided by a commitment to inclusivity and holistic development, acknowledging the pivotal role of… pic.twitter.com/uuikQID5KF
— Conrad K Sangma (@SangmaConrad) September 19, 2024
Ha ka jingkren plie jong u, u Myntri Rangbah u la ong, “Nga sngewskhem ba kane ka sienjam kan long kaba jop namar nga lah ban sngew ia ka jingsngewtynnat jong ki briew kiba donbynta ha kane ka kam kaba pynlong ia ki ban leh ia kane ka kam ba ki trei”.
“Nga kynmaw ha ka por ba nga dang leit sha Australia kum u MP ha u snem 2016 sha kawei ka Research Institute ha kaba nga la ïakynduh ïa uwei u Professor uba la leh ïa ka jingpule bniah shaphang ka China bad u la ong ba ki samla ka ri India ki lah ban long ka bor kaba khraw tam jong ka Ri ne ka jingeh kaba khraw tam. Nga sngewthuh ba ngi kum ka Ri bad kum ka jylla ngi donkam ban pynleit jingmut ha ka jingroi jong ki nongshong shnong jong ngi naduh ba ki dang kha haduh ki snem jong ka jinglong khynnah, samla, bad kumta ter ter” ula ong
Haba kren shaphang kumno ka sorkar jylla ka la shim katto katne ki jingïarap ban pynleit jingmut ym tang ïa ki khunlung ba dang kha hynrei wat ïa ki kmie ruh kumjuh, u la ong, “Ngi tip kum ka sorkar ba ngi hap ban leh ei ei ban pynïasoh lang ïa ki tnad bad ki jingdon jingem bad sa sdang ia ka kam. Haba shong bishar ia ki jingkhein ha u snem 2018, nga sngewthuh ba ka jingiap jong ki kmie haba kha khun ka long kaba heh bha haba ianujor bad ka jingkhein ha ka ri baroh kawei. Ngi dang pyrkhat ba dei ki jingkha khun ha ki jaka sumar kiba long ka daw jong ka jingeh hynrei ngi la sngewthuh ba ka dei tang shibynta jong ki jingeh ba kham heh. Da kaba pyrkhat ïa kane, ngi la sdang ban pynleit jingmut ha kaba lap kloi ïa ki longkmie kiba don ha ka jingma bad khatduh ngi la sdang ïa ka skhim Chief Minister’s Safe Motherhood Scheme (CM-SMS)ha u Lber 2022, kaba dei ka prokram ha Meghalaya kaba thmu ban pynduna ïa ka jingïap jong ki longkmie bad ki khunlung .
Ngi sngewkmen ban ïohi ïa ki jingmih hynrei ngi dang ïaleh katba lah ban pynthikna ba ym dei ban don kawei ruh ka kmie kaban duh ïa ka jingim ha ka por ba kha khun.”
Halor kine kiei kiei, u Myntri Rangbah u la ong ba ka sorkar ka la sngewthuh ba lada ka jylla ka dei ban shim ia ka bor jong ki pateng kiba dang wan, ka hap ban tuklar, kyrshan bad ialam lynti ia ki ha ka rukom kaba pura naduh ba sdang ka jingim jong ki haduh ba kin da san samla .
U Myntri Rangbah u la ong ruh ba namar ba kane ka prokram ka long kaba kongsan bha ha ka liang ka koit ka khiah, ha kaba kan donkam ban don ki kyndon ban buddien, pynbha bad pynthikna ia ka jingroi jingpar baroh kawei jong ki samla nongshong shnong jong ngi naduh ba dang kha bad kyntu ia baroh ki kynhun ba don bynta ha ka kam, ba kin shim ia ka jingkitkhlieh bad ban trei da ka jingsngewtynnat na ka bynta ka jingjop jong ka jingthmu.
Kiwei pat ki nongkren ha kane ka sngi, ki la kren halor ki bynta bapher bapher jong ka jingroi jingsan jong ki khynnah bad kumno ban kyrshan ia ka jingroi jingpar jong ka jingmut jingpyrkhat bad ka bor pyrkhat jong ki khyllung ba dang kha khamtam haduh 3 snem ka rta. Ki jingbthah kin iarap ban ai ia ki rukom treikam ba thikna halor kane ka bynta.
