Shillong, Lber 04 : Ka Myntri ba khmih ia ka kam rep Kong Ampareen Lyngdoh ha ka sngi Ba-ar kala pyntip ba ka Sorkar kala pyllait ia ka pisa ba T.6.8 klur ban iarap ia palat 3005 ngut ki nongrep kiba shem jingeh na ka jingthung ia kiwei ki jait jingthung.
Kumjuh ruh T. 5 klur la tyrwa hapoh ka RKVY jong u snem mang tyngka 2024-25 ban iarap ia ki nongrep bas hem jingeh khnang ban pynthikna ba ka kamai ka kajih jong ki kan ym shah ktah, kala ong haba jubab ia ka jingkylla bala wanrah da u MLA ka TMC Rupa M Marak halor ka jingsyllad u khniang ia ki shylluit diengkwai ha Dadenggre bad Rongram Block.
Kala pyntip ba ki don 209 ngut ki nongrep ba shah ktah na ka jingbam khniang ki shylluit dieng hapoh Dadenggre C&RD Block bad 467 ngut hapoh ka Rongram Block.
Halor ka sienjam ban tehlakam ia u khniang jingpang, ka Myntri kala ong ba ki nongrep kila ioh jinghikai halor ka jingbam khniang ki shylluit bad ki lad ban tem ia ka kynthup ka jingthang ia ki dieng ba shah ktah, ka jingleh khuid ha ki jaka rep bad kiwei kiwei.
Kala bynrap ba naba kane ka jingpang bam khniang ki shylluit diengkwai kala jia ha kiwei ki jaka ruh, ka Directorate of Horticulture kala iatreilang bad ka Indian Council of Agricultural Research (ICAR), Krishi Vigyan Kendra (KVK), Meghalaya Bason Management Agency (MBMA) bad ka Scientist of Central Plantation Crops Research Institute (CPCRI), Kahikuchi, Assam bad Kasargod, Kerala.
“Haba pynshong nongrim ia ki jingshem bad ki jingai jingmut jong ki stad ki jhad, ka Directorate kala ai jingmynjur ban sam ia ki kot lyngkdop ba don ia ki jingbthah bad jingbatai ia ki lad jingiada bad ki lynti ban iakhun ia kane ka jingpang, sha ki nongrep diengkwai” kala ong.
Nalor kane,ka Myntri ka pyntip ba ka Sorkar ka dang iaid shaid shaid ba iasnohkti kti bad baroh ki Nongrep, kiba shah ktah na ka jingpang bam khniang ki shylluit diengkwai bad ka jingwad bniah ruh ka dang iaid shakhmat ban tehlakam ia kane ka jingeh.
