Shillong, Lber 04 : U Myntri Rangbah ka Jylla Conrad K Sangma hynne ka sngi Ba-ar ula pynthikna ba kan nym don satia ka jingbuhpor ban pynlip bording hapoh ka Jylla.
Haba pyntip ba ka Tnad kala lah ban pynjanai ia ka jingtreikam, u Myntri Rangbah ula ong ba katto katne ki sienjam la ia shim da ka Tnad ban pynthikna ia ka jingshakri kaba kham bha sha ki nongthang bording ka Meghalaya Energy Corporation Limited (MeECL).
Ula pyntip ruh b aka Sorkar Jylla kan sa pynkha ia 10 tylli ki sub station ba thymmai ha ki jaka nongkyndong ban pynthikna ia ka bording ka bym don jingthut.
Ula pynbna ia kane haba pyllait ia ka One Time Settlement (OTS) scheme na ka bynta ki nongthang bording ka MeECL ha ka jingiadon ryngkat u Myntri ka tnad bording Abu Taher Mondal.
Haba pyllait ia ka skhim, u Myntri Rangbah ula ong ba jan kot 45000 ki nongthang bording kin ioh jingmyntoi bad palat T.26 klur na ka surcharge ne ohdor tam bad ka kuna yn sa map noh. “Ki nongthang bording kin hap ban siew tang ia ka trai ba 40% bad ka 60% ba sah kin siew da ka instalment khlem ka sut” ula ong.
Ula kyntu ia ki nongthang bording ba kin shim kabu ia ka skhim bad ban shim ia ki jingmyntoi bala ai da ka Sorkar. Ula ong ba kane ka sienjam ka dei kaba la shim da ka Sorkar ban pynduna ia ka jingkit ba khia ha ki nongthang bording, ki bym shym la lah ban siew ia ka bai bording.
Ka OTS scheme ka treikam tang ia kiba pyndonkam ia ki “Domestic Low Tension (DLT)” bad “Kutir Jyoti/ BPL” kiba la pynbna ba ka bording ba ki thang ka long hapoh ka 5 KW jong ki longiing bala shah ot bording namar ka jingbym siew bai bording, khnang ban ioh noh ia ka bai bording ba sah baroh.
Kane ka OTS scheme kan treikam naduh ka 1 tarik u Lber 2025 haduh ka 31 tarik u Lber 2025. Tang ki longiing kiba la shah ot ka bording ki lah ban aplai ia ka OTS scheme bad ioh ia ki jingmyntoi.
Ka bai bording ka bym pat siew baroh lang da ki nongthang bording kala kot ia ka T.119 klur.
 scheme na ka bynta ki nongthang bording ka MeECL ha ka jingiadon ryngkat u Myntri ka tnad bording Abu Taher Mondal.){kind=link}