Pynjari ka DC da ka kyndon 163 BNSS
Shillong, K’lyngkot 03 : Katba ki seng niam ki dang pyrshang ban wanrah ia ka jingiatylli bad ka jingialong kawei, ka Balang Presbyterian ha kawei ka shnong jong ka thain Mawryngkneng kala sakhi ia ka jingiapait Balang bad poi sha ka jingiakynad hapdeng ki arliang kynhun kiba la jied ban iaid noh hala ka jong ka lynti.
Kane ka jingjia kala jia ha ka Balang Presbyterian jong ka Balang Ksehpyndeng, kaba hap hapoh ka Mawryngkneng Police Station.
Ka jingiakynad kala jur kala mih hapdeng ki arliang kynhun hadien ba ka kynhun ba dang shu iapait Balang, ka thmu ban pyn baptis thymmai ia ki riewngeit jong ka Shnong, ka ban long la Sngi U Blei ban wan.
Haba iohi ia ka jingma ba lah ban jur ka jingiakynad, ka Deputy Commissioner ka East Khasi Hills Kong R.M Kurbah kala pynmih da ka hukum ba pynjari da ka kyndon 163 BNSS ba khang ban ialum paidbah ha ka jaka ba mih ka jingiakynad.
Kala maham ba kino kino kiba pynkhein ia kane ka hukum kin ngat ha ka jingpynsajia kat kum ka kyndon 223 jong ka BNS.
Ia kane ka hukum la pynmih hynne ka sngi Thohdieng bad la pyntip ba kan treikam mardor.
