Shillong, Risaw 01: Ka Khasi Students Union kala dawa da ka jingtohkit kaba khuid bad ba laitluid pyrshah ia ka jingkynnoh lum pisa be-aiñ ki pulit ha ki Check Gate kiba don ha ka shnong Mawkhanu bad Thangshalai bad ong, ban ujor ejahar bad ki pulit hi ka long ka bym don jingmut.
U General Secretary ka KSU u samla Reuben Najiar ha ka sngi Palei, ula ong ba ki dkhot jong ka seng ha ka sngi Balang kila lap ia ki pulit ba kila lum pisa be-aiñ na ki trok ha ka por mynsngi mynshai.
“Hynnin ka sngi, ki dkhot ka KSU kila hiar sha Mawkhanu bad Thangshalai bad lap ia ki Police Check Gate ba ki lump isa be-aiñ ha ka por mynsngi mynshai, ha kaba ki trok kiba iaid na katei ka jaka kila leit ban ai pisa” la ong u Samla Najiar.
Ula kynnoh ba katei ka jinglum pisa be-aiñ kala jia namar ka jingtip lem jong ki bor kiba halor.
“Ki pulit ki ioh ia ka tulop bad balei ba ki hap ban leh kumtei? Ngi ngim iakren na ka bynta kito kiba bat ia ki kyrdan kiba rit namar ba ki ioh ia ka hukum bad ki hap ban pyndep ruh ia ki, hynrei ki don pat kito kiba shong ha Secretariat bad ha SP Office kiba ai ia ka hukum ban leh kumtei” ula ong.
Haba dawa ban leh ia kaba tyngeh, u Samla Reuben Najiar ula ong, “Mynta ka seng ka dawa ba dei ban weng noh mardor ia u DC bad DC bad kadei ruh ban don ka jingshimkam da ka tnad pyrshah ia kitei ki briew bad lada lap ba ki leh bakla, dei ban kem noh mardor ia ki”.
Ha kaba iadei bad ka jingujor ejahar, ula ong, “Ban ujor ia ka ejahar ban peit iano, ki pulit kin sa ong, ba kin sa khmih halor katei, kan don jingmut aiu? Ngi kwah ia ka jingtohkit kaba khuid bad ka kynhun kaba khuid kaban tohkit ia katei, namar ba, kumno u nongtuh un bishar hi ia u nongtuh, kata kam lah ban long, hynrei tang ban shu pyndep rukom ngi hap pat ban pyndep ia katei”.
