Shillong, Risaw 01: Shisngi hadien ka jingkhynra ka KSU kala sei pyrthei ia ka jingkynnoh khrong pisa beain ki Pulit ha Mawkhanu bad Thangshalai, u General Secretary ka KSU ba don ha phatok samla Reuben Najiar, ula buh jingkylli la ki kam thombor ha ka rally 19 tarik a dei ka shrip ban pynngat ia ki nongialam ka KSU.
U samla Reuben ula leit hajir hakhmat ka Iingkashari ha ka sngi Palei haiden 14 sngi ba ioh bah jamin ba shipor namar ka jingkhlad noh u Kpa, ula ong ba ka jingbishar halor ka rally mynta kan iaid biang.
“Mynta, hadien ba don ha ka jamin ba 14 sngi namar ka jingjia ba sngewsih ha Iing, Nga la wan mih hangne ha Iingkashari kat kum ka hukum ka Iingkashari ba nga dei ban wan mih hakhmat jong ka ha ka 1 tarik Risaw” ula ong.
Ha ka jingjia 19 tarik Nailar, ula ong “Ngim shym la leh bakla eiei ruh em bad ka jingkem da ki Pulit ka dei ia ka daw kaba tip tang ki Pulit, namar kum ki nongialam kiba don hakhmat, ngi khlem kawang maw lane shoh iano iano ruh, hynrei watla kila kem ia ngi, ngi pdiang ia ka”.
Haba kdew ia ka jingkren u Superintendent of Police ka East Khasi Hills Bah VivekShiem ba la ai jingbit ia ka rally halor ka jingshaniah bad kumta ym shym la buh pulit shuh, u samla Reuben ula ong ‘Hato dei ka jingshaniah ne ka shrip, namar ngi ruh ngi tip ba ka dei ka shrip ban pynngat ia ki dkhot bad ki nognialam jong ka Seng, na ka daw ki ishu kiba ngi iakhih, ngi khlem kynran dien”.
“Kumta, haba ka Sorkar ka sngew ba kam lah ban pyndem ia ngi, kala phah ia ki mafia ne ki riew runar ba kin iadonlang ha katei ka sngi (rally) ban pynmih ia ki jingkulmar” ula kynnoh.
U samla Reuben ula kdew ia ki jingpher ha ka rukom buh ia ki Pulit ha ba don kino kino ki rally.
“Haba don ki rally ka KSU, ki ju don beit ki Pulit naduh kaba sdang haduh kaba kut ban pahara, kumba la iohi ha ka rally ka VPP ha ka 6 tarik Nailar, ha kaba ki Pulit kila pahara ia ka secretariat baroh kawei, hynrei ha ka sngi ba iaid rally ka KSU, ym shym la don ba pahara, ym don wat u Pulit traffic ruh” ula ong.
Ula ong ka Seng kam don jingtip ia kino kino ki kam thombor ha ka por ba iaid rally. “Katba ka rally ka dang iaid, ym shym la don satia kino kino ki jingjia, tad hadien bala kut ka rally ba ngi tip ba kum kine ki jingjia kila jia” ula ong.
“U SP, u DC ki iadon ia ki phone nombor jong ngi. Haba jia kum kine ki jingjia, balei ba ki khlem phone lane bthah ia ngi ban sangeh, hynrei kila ailad ia ka rally ba kan bteng haduh palat 2 kynta bad dei hadien bala kut ba ngi sa tip lyngba ki lad pathai khubor” ula ong.
Haba pynrem ia kine ki kam thombor, u samla Reuben ula ong ba ki dkhot ka KSU kim don bynta eiei ruh em.
“Ki lah ban don ki riew runar kiba hijack ia ka rally jong ngi” ula ong, haba pynpaw ba ha kane kajuh ka sngi, ki briew na Shree Cement kila pynlong ia ka press conference ne iakynduh ia ki lad pathai khubor.
Halor ki kam ki Pulit, ula ong “Ngi beit ba ka jingbishar kaba hok bad ba khuid kan ieng bad ngi kmen bha halor ka jingkem da ki Pulit namar kila pyni ba naduh mynta, haba ki briew ba rit b aria ki leh eiei, kin sa kem ia ki briew kiba heh”.
Haba phai sha ki jingkynnoh khrong pisa beain, ula ong “Ha ka por ba long ka rally ngi la ieng kum ki rangbah bad kane ka jingjia kala jia hapoh ka jingkitkhlieh jong ngi, ngin kit bad bahkhlieh. Mynta ba ka jingbamsap ki Pulit kala jia, mano ban kit bad bahkhlieh?”.
“Baroh kine ki jingjia kila jia hapoh ka jingkhmih jong u, ym lah ban shu ong ba um don jingtip ia kane, namar ha ka 8 tarik lyngba ki lad pathai khubor ngi iohi ba ka don ka jingkhrong pisa na ki trok. Balei ba ka tnad Pulit ka sngap jar, balei ba ki bor district bad ka Sorkar ki sngap jar, hato kam dei ka rukom treikam kaba baroh ki don bynta lang ha ka bamsap” buh jingkylli u samla Reuben.
“Phi kem ia ngi namar ba ngi pynlong ia ka rally, kam pher. Mynta ki Pulit kila khrong pisa beian, iano phin kem?” ula ong.
