Mallangkona, Jylliew 21 : U Myntri Rangbah ka Jylla Conrad K Sangma ha ka sngi Thohdieng, ula ong ba ka jingshngain bad ka jingiada ia ki paidbah ka Jylla ka dei ka mat ba hakhmat duh jong ka Sorkar MDA haba plie ia ka building ba thymmai jong ka Mallangkona Police Outpost, West Khasi Hills.
Ka Mallangkona ka dei ka shnong kaba don markhap k Assam bad ka dei ruh kaba ju mih bha ka jingkynad namar ka jing wan pynibor jong ki nong Assam ha ki por bala leit noh, kaba lam sha ki jingkulmar kaba shyrkhei.
“Kane ka dei ka jingdawa bala slem bha jong ki paidbah ka Mallangkona ban ioh iaka Police Outpost. Kane ka jingwanrah ia ka Police Outpost ba thymmai kan phah ia ka khubor ba ka jingshngain bad ka jingiada ia ki briew jong ngi ka dei kaba kongsan tam” ong u Conrad.
Ula ong ruh ba kum kine ki jingtei ka Tnad Pulit kin sa mih ruh ha ki jaka kiba ju mih ki huri hura ha kylleng ka Jylla khnang ban lah pynthikna ia ka jingiada iala ki jong ki nongshongshnong.
U Myntri Rangbah u pyntip ba ia ka Mallangkona Police Outpost ba thymmai la tei lyngba ka Police Infrastructure Renovation Fund (PIRF) kaba la ai mynta sha baroh ki Superintendent of Police ba kin don ia ka pisa ha kaban pyndonkam ha ka jingmaramot, tei ia ki jingtei ba thymmai hala ki jongki District khlem da donkam ban shim ia ki jingmynjur na ka Sorkar Jylla.
Ha kajuh ka por, u Conrad ula ai ka jingiaroh ia ki paidbah ka Mallangkona kiba la wan shakhmat ban iarap ia ka Sorkar da kaba trei kum ki nongbylla bad kumjuh ruh ban ai ia ki tiar ki tar. “Kane ka dei ka nuksa kaba bha tam jong ka imlang sahlang ban wanlang. Nga kwah ban pynshlur ia kiwei ki jaka ruh ki ban mih kum kine ki project ba ki shnong ki thaw kin mih shakhmat bad long shibynta jong ka project. Kan phah ia ka khubor kaba bha tam” ong u Myntri Rangbah.
Shuwa kane, u Superintendent of Police ka WKH Bikrem Sangma ula pyntip ba kane ka Police Outpost ka dei kaba la seng naduh u snem 2019.
Ia kane ka building la tei ha ka jinglut kaba kot T.17.5 lak, na ka Police Infrastructure Renovation Fund (PIRF) skhim ha shnong Mallangkona kaba hap hapoh ka Mawshynrut Civil Sub Division.
