Shillong, Jylliew 20 : Sngewsarong ia ki nongshna jingshna da ki kti (craftman) ka Jylla Meghalaya-kaba ka jingpnah bad jingni kti jong ki ban pynmih ia ki tiar ba ki shna da ki siej bad kdait, kala pynlong wat ia u Myntri Rangbah Duh ka Ri Narendra Modi, ban pyndonkam ia kine ki tiar ka Jylla Meghalaya kum ka jingai sngewbha sha ki Nongialam ki Ri ka Pyrthei.
Kawei ka tiar shna kti jong ki nong Meghalaya-kala rung mynta haduh ka Iingsah jong u President ka Ri Brazil u Luiz Inacio Lula, ha Brasilia, uba la ioh pdiang ia kane ka tiar kum ka jingai sngew bha na u PM Modi ha ka jingiakynduh hapoh ka G7 summit ba long ha Canada.
Kane ka tiar ka dei ka lieng ba shna da u kdait bad ki siej bad la pynwandur ia ka khmut jong ka lieng ha ka dur jong ka radha (swan) bad ka met da ka temple.
Ka radha kaba la pynwandur hakhmut jong ka lieng ka ieng ia ka jinglong sngur bad jingitynnad, katba ka jingshna ba hapdeng ba iasyriem kum ka temple ka pyni ia ka jingiadei hapdeng ka mariang bad ka jinglong mynsiem. Ki jingshna barit baria kum ki mawkyndon, ki lama ki nang pyni kyrpang shuh shuh ia kane ka rukom pynwandur.
Ia kum kine ki tiar shna kti la ju shna da ki paid Khasi bad Garo, kiba pyndonkam ia ka rukom thain bad teh ia ki siej bad ki kdait kat kum ka rukom tynrai ba la hikai pateng la pateng, khlem da pyndonkam ia ki prek lane ki jingtah ba bit pnah.
Kane ka lieng ka long ruh kum ka tiar buh pynitynnad ia ka iing ka sem bad ka dak jong ka kolshor, kaba pyni ia ka jinglong ki nong Meghalaya ba burom ia ka mariang bad ia ka jinglong tynrai.
U PM Modi ula iakynduh ia u Luiz Inacio Lula da Silva shabar jong ka G7 summit ba long ha Canada ha ka 16 bad 17 tarik Jylliew.
Nalor u President ka Brazil, u PM Modi ula ai sngewbha ruh ia ki tiar shna hi jong ki paid riewlum ka Ri India sha u President ka South Africa Cyril Ramaphosa, ka jingdro dur sha u President ka South Korea Lee Jae-Myung, bad ka jingdro dur sha ka President ka Mexico Claudia Sheinbaum.
