Shillong, Jylliew 19 : U Superintendent of Police ka East Khasi Hills Bah Vivek Syiem, ula iathuh ba u lok uba pyniap iala ka jong ka kurim ha Nongrah, Nonglum, ula leh ia kane ka kam bymman namar ka jingsuba sniew ba ka don jingiadei shawei.
Une u briew u kyrteng u Donald Sohtun, uba la pyniap ia ka kurim kong Priya Khongstia da kaba ksih bad pduh da u maw na ka khlieh ha ka Iingsah wai ha Nongrah, Nonglum hashuwa ba un kyllain ia ka met ha ka blanket bad phet krad ialade.
U Bah Vivek u iathuh ba ha ka jingthkit, u Donald Sohtun ula phla ba ula leh ia kane ka kam namar ka jingsuba baka kurim, ka don jingiadei shawei pat. U iathuh ba kine ki shikurim kila poi sha ka jingiania kaba khluit.
“Ngi la kem ia u Donald hadien ba ula wan ban aiti ialade” ong u Bah Vivek haba iathuh “Ngi la shim ia kane ka jingjia kum ka Special Report Case bad shen ngin sa Chargesheet noh ia kane ka case ” ula ong.
U Bah Vivek u iathuh ba ia ka met jongkakong Priya la lap hadien 3 sngi jong katei ka jingjia bad la ujor ia ka ejahar ha ka 30 tarik u Jymmang.
Halor ka jingkylli, u SP ula ong ba ka kynhun jongka Forensic kala leit ban pynlong iaka jingtohkit kaba bniah ha katei ka iing ba don kane ka jingjia.
Da ka jingiarap jong ki ksew kiba la pyntbit ha kaban sma ne Sniffer Dog, ki pulit kila lap ia u maw, uba la pyndonkam ha ka kam ban pyniap. U Donald mynta u don hapoh ka Judicial Custody.
