Guwahati, Jylliew 19: Ki pulit ka Jylla Assam ki la kem ia 5 ngut ki briew bad ki la sdang ruh ban shim daki sienjam ba tyngeh pyrshah ia 3 ngut ki pulit ba kynthup ia uwei u assistant sub-inspector halor ka jingtwa jong ka jingkieng kaba dang shu maramot thymmai halor ka wah Harang kaba hap ha Cachar district.
Kane ka jingkieng kaba don ha ka surok Silchar–Kalain kadei kaba kongsan bha bad kala khyllem noh ha ka por mynstep katba ar tylli ki trok kiba la kit palat pud ki la pyrshang ban jam sha shilliang da kaba pynkhein ia ki kyndon ba la buh ia ka jingkhia.
Watla kam shym la don kano kano ka jingmynsaw, hynrei ka jingkhyllem jong kane ka Jiengkieng ka la pynthut jur ïa ka jingpynïasoh surok hapdeng ka Assam’s Barak Valley bad ki jylla ba marjan kum ka Tripura, Mizoram, bad Manipur lyngba ka Jylla Meghalaya.
U Senior Superintendent of Police (Cachar), u Numal Mahatta, u la pynthikna ïa kitei ki jingïoh kem bad u la ong ba ka jinglap ba nyngkong ka kdew sha ka jingbym shimkhia bad ka lah ban don ka jingïasuhbuit ha katei ka Police Check Point.
“Ka jingtohkit kaba nyngkong ka kdew ba kawei na ki trok kaba iaid stet, hapdeng u slap ka la tynrah ia kawei ka bynta jong ka jingkieng. Kane ka paw ba ka daw ba la pynlong ia ka jingkhyllem ka Jingkieng. Ki trok ki la kit palat pud bad kim dei ban shah ban iaid. La shim khia ia ki 3 ngut ki pulit kiba don ha ka kam ha katei ka por” la ong u Numal.
Ki nongshong shnong ki la kynnoh ba ki pulit ki leh matlah bad kila pynkheiñ bunsien ïa ki kyndon kit khia da kaba kynnoh ba ki kali heh ki ju ïaid lait ïa ki jingkhang daka ba iasuhbuit bad kiba pahara haka Check Point.
Kane ka jingjia ka la pynmih ïa ka jingbitar, khamtam namar ba dang shen dang dep ban maramot bad la khmih lynti ba kan pynduna ïa ki jingeh ha ka leit ka wan ha katei ka thaiñ.
