Guwahati, Naitung 20: U nongrwai bad nongthaw jingrwai ba pawkhmat ka jylla Assam, u Zubeen Garg u la don hapdeng ka jingshah sumar hapoh ka hospital hadien ka jingmynsaw na ka jingur ha kawei ka Resort, ka ba la jia ha Dibrugarh hynne ka sngi.
Ia u Zubeen yn pynkynriah noh da ka liengsuin na Dibrugarh sha Guwahati mynta ka jan miet.Na ka liang ki lad pathai khubor iathuh ba une u nongrwai u la hap hapoh ka jaka sait hapoh kawei ka resort.
La pynkit noh ia u mardor shapoh hospital ha ka ba ki doktor ki la leh ia ka CT scan. Ki doktor ki la ong ruh ba ki la hap ban suh ksai na ki bynta ka khlieh jong u Zubeen.
Kham hashwa, na ka liang u Myntri Rangbah (CM) ka Assam u Himanta Biswa Sarma u la ong ba lada donkam ia une u nongrwai yn pynkit da ka liengsuin na ka bynta ban leit shah sumar shuh shuh.
Nalor kata u la bthah ruh ia u Deputy Commissioner ka Dibrugarh ba un bishar bniah halor ka jinglong jingman ha ka koit ka khiah ka jong u.
U Zubeen Garg u la pynmih ia ki jingrwai Assamese, Bengali bad na ka bynta ki phlim Bollywood kumjuh.
Ki katto katne ki jingrwai ba pawnam jong u ki kynthup ia ka jingrwai “Ya Ali” na ka phlim Bollywood ‘Gangster’, “Dil Tu Hi Bataa” na ka phlim jong u Hrithik Roshan ka ‘Krrish 3’, nalor kiwei pat.
