Shillong, Naitung 20 :Ka Clean Sohra Campaign (CSC), ha ryngkat ka jingiatreilang bad ka Meghalaya Grassroot Music Project ba la kyrshan da ka tnat Tourism ka sorkar Meghalaya ka la pynlong ia ka ‘musical show’ ha ka sien ka ba nyngkong eh hapoh ka krem ha Arwah, Sohra.
Ka jingthmu ha ka ba pynlong ia kane ka tamasa ka long ha ki ar bynta, kata ban kyntiew ia ki kam jngohkai da ka ba bynrap lang ia ki jingtem jingput na ka bynta ki nongwan shangkai sha kane ka jylla, bad ka ba ar ban kyntiew halor ki sap ki phong tynrai.
Ka kynhun tem ba pawkhmat ka Summersalt ka la shah khot sngewbha ba kin rwai ia ki jingrwai jong ki na ka album ka ba ar jong ki bad pynlong ruh ka jingiamir jingmut bad ki nongtem nong put jong ka thain Sohra.
“Kane ka la pynkmen shibun ia ngi ba ngin ioh lad ban tem bad rwai ia ki jingrwai jong ki samla nongtem nongput. Ngi la don ha katei ka jaka ban shim ia la ka jong ka bynta bad ban pynshlur na ka bynta ki nongtem nongput ki ba hadien ki ban pynpaw ia la ki jong ki sap ki phong,” ong u Bah Kit Shangpliang na ka kynhun Summersalt.
Na ka liang u nongialam jong ka Clean Sohra Campaign u Bah Alan West Kharkongor u la ong; “Ka jingioh jingmut ban pynlong ia ka ba kum kane ka tamasa ka long ban pyntip sha ka pyrthei ba haduh katno ka long ka ba donkam ban shim ia ka jingkitkhlieh na ka bynta ban iada bad pynneh pynsah ia ka mei mariang, kata la ka long ki krem ki kroh, ki wahduid, ki kshaid bad kiwei pat.Kane ka jingkhot ban ialehkmen ha ryngkat ka mariang ka ba itynnad ka ba ka thain Sohra ka don ka dei ka jingkyrkhu ka ba khraw nalor ki jingtem jingput tynrai ki ba long shisha ka lynti ka ba paka tam na ka bynta kane ka jingthmu.”
