Shillong, Naitung 06 : Lai ngut ki samla kila iap ha ka jingaksiden kali ha ka janmiet sngi Nyngkong hadien ba ka scooty ba ki iashong, kala leit tynrah ia kawei ka trok kaba pynieng harud jong ka surok Shillong Bypass ha ka thain Umroi, Ri-Bhoi.
Kat kum ka khubor Pulit, kane ka jingjia kala jia ha ka por 8:30 baje mynmiet hajan ka madan phutbol jong ka Umroi ha Shillong Bypass.
Ki Pulit ki iathuh ba lai ngut ki samla kila iashong ha ka scooty ha ka por ba ka leit tynrah ia kane ka trok. “Ka jingtakhuh ka long kaba la jubor bha, bad baroh laingut kila mynsaw jur, kaba lam sha ka jingiap noh jong ki. Ia kine ki samla la pynkut sha hospital hynrei ki doktor kila pynbna ba kila iap ha lynti” ong ki Pulit.
Ka kynhun ki Pulit na Khapmara Police Investigation Centre (PIC) kila hiar sha katei ka jaka bad pynlong ia ka jingtohkit.
Baroh kine ki samla ki dei ki nongshongshnong ka Umden Umsaitprah.
