Shillong, Nailar 19: U Myntri Rangbah ka Jylla Conrad Kongkal Sangma hynne ka sngi thohdieng, ula plie ia ka building bad hostel ba dang shu dep shna thymmai jong ka College of Teachers Education ha Rongkhon, Tura ha ka jingiadonlang u MLA ka North Tura Thomas A Sangma.
Through new infrastructure for educational institutions & our programmes for child & youth development, it has been our constant effort to improve education & literacy especially in rural areas while also focusing on enhancing the capacity of students@dpradhanbjp pic.twitter.com/FVkkGTARLY
— Conrad Sangma (@SangmaConrad) August 19, 2022
Ka College of Teachers Education ka dei kawei na ki Intistute ba heh ha ka Jylla kaba la seng naduh u snem 1993 bad ka dei kaba ai ia ki jinghikai B.Ed degree course ia ki Nonghikai.
Kane ka College ha Tura kala plie lynti ia ki Nonghikai ba kin pyntbit ialade bad kumjuh ruh ia ki samla pule ba kin ioh ia ki kam hikai ha ki kyrdan bapher bapher khamtam ha ki kyrdan pule Secondary la ka dei ka kam hikai ha Jylla ne shabar ka Jylla ruh kumjuh.
Ia kane ka building bad ka hostel jong ki shynrang bad kynthei la shna ha ka jingpynlut ba kot T. 18.04 klur bad la dei tyngka ia ka da ka Asian Development Bank (ADB) Supporting Human Capital Development ha Jylla Meghalaya, ka project kaba la pynwandur da ka Sorkar Jylla.
Kane ka jingtei kan pynlong ruh ia ka Jylla kaba don ia ka jaka pule ban ai jinghikai B.Ed bad M.Ed kaba long kat kum ki kyndon jong ka NCTE.
Haba kren ha ka jingialang, u Myntri Rangbah ka Jylla ula ong ba naduh u snem 2018, ka Sorkar Jylla kala shimkhia duh ia ka pule ka dangle bad kala kynshew pisa bha ha ka kam pule dangle.
Haba kdew ba kam don satia kano kano ka policy kaba shai ban pynthikna ia ka jingkiewsted jong ka kam pule dangle ha ka jingsynshar ka sorkar bala leit, u Myntri Rangbah ula ong ba kane ka Sorkar ba mynta kala ithuh ia ki jingduna bad kala pynleit jingmut bha ban pynbiang ia kiba donkam n aka bynta ka jingkiew shakhmat jong ka kam pule dangle.
Hynrei ula ong ba ki jingeh ki don bad ka Sorkar kam lah satia ban weng mardor ia baroh hynrei kan hap shim kawei hadien kawei ka sienjam ban leh eiei ia kane ka bynta.
U Myntri Rangbah ula ong ba ka jingkynshew haduh T. 18 klur tam ka dei shisha ka jingeh ia ka Sorkar ha u snem 2018 namar ka jingjynjar ban ioh pisa hynrei ka Sorkar kala wad ia ki lad ki lynti ban pynthikna ba kane ka jingtei kan iaid shakhmat.
