Shillong, Nailar 19: U National Vice President ka NPP Bah Prestone Tynsong u la kitbok ia u Bah RM Shabong uwei na ki nongialam ka NPP na riwar Pynursla uba dang shen u la pyniasoh noh sha ka UDP.
Haba kren bad ki lad pathai khubor u Bah Prestone ba dei ruh u Symbud Myntri Rangbah ka Jylla u la ong ba ha ka politik hi kim lah ban khang ïano kano bad kumta u ai tang ka jingkitbok ia u.
“Ngam tip shuh balei u mih. Tangba ym lah ban tip ioh lehse kum u riew rangbah ba la ih ha ka politik u la kham sngewthuh bha bad u la shim ia ka rai ban mih noh na ka party NPP ban pyniasoh sha ka UDP” ong u Bah Prestone.
” Kaba nga don ban ong ka long ba nga ai tang ka jingkitbok kitrwiang ia u,” ula bynrap.
Haba jubab pat ia ka jingkylli, u Bah Prestone u ong ruh ba ha ka politik kam ju don kano kano ka jingma namar hap ban don beit kiba iakhun pyrshah la ka long ïano iano ruh.
U ong ruh ba um sngewpher lada ki ia kren ia kata ka sur ban ia tylli bad pynliem ia u namar ha kaba kut kumba ka la jia naduh ki snem 1972, tang shu wai ka meeting katei ka jingiakren ia tylli ka kut noh hangto hi.
