Shillong, Naitung 23: U Lat ka jylla u Phagu Chauhan ha ka sngi Ba-ar, u la plie paidbah ia ka Library ba dang shu dep tei pynheh jong ka ka Khasi Hills Autonomous District Council (KHADC).
La plie ïa kane ka library ha ka jingïadon lang baroh ki MDC bad ki nongtrei jong ka KHADC.
Haba kren sha ki lad pathai khubor, u CEM ka KHADC u Bah Pyniaid Sing Syiem u la ong ba naduh ba la sdang ia ka Autonomous District Council ha kane ka jylla Meghalaya ha u snem 1952, ka Library jong ka Council kam long satia kat kum kan ka juk mynta.
U Bah Pyniaid u la pyntip ba hapoh katei ka Library ba la tei pynheh la buh ia ki kot bapher bapher, ki kot ki sla bad kiwei ki jingtip naduh ki riti dustur, ka synshar khadar, ki jingleh nala tynrai, ki jingtip shaphang ki Syiem, ki Raid, ki shnong ki thaw, ka rukom bat khyndew ha ka ri Khasi bad ki jingthoh halor ki ain, ki kyndon bad ki kyndon, ki jingbishar.
“Ka rekod kaba rim tam shaphang ki kam jong ka KHADC, ka dei kaba la thoh naduh u snem 1952 bad kum kine ki rekod yn buh ha ka library” la ong u Bah Pyniaid.
U Bah Pyniaid ula pyntip ba nalor ban buh ïa ki jingtip ba kongsan bapher bapher, ha kane ka library yn buh ruh ïa ki kot ba la thoh da ki dkhot ka KHADC bad kiwei, kum ka nuksa, u nongïalam Rangbah bah BM Lanong uba la noh synñiang 2 tylli ki kot kiba u la thoh.
“Ka KHADC ka dang ïatreilang bad u Librarian jong ka Ïingdorbar Thawaiñ ka Jylla Meghalaya ban ithuh ïa ki jait kot ban thep ha katei ka library kaba dang shu plie thymmai” u la bynrap.
Nalor kane u CEM u la pyntip ba shen ka district council kan sa pyllait ia ka jingpynmih ia ki 40 ngut ki nongpynmih kot kiba dang pynlong ia ki jingwad bniah ha ki sobjek bapher bapher.
