Shillong, Risaw 18: Ka skulbah North Eastern Hills University (NEHU) ryngkat ka Tripura Adventure Social Organization bad ka Bangabandhu Sheikh Majibur Rahman Agricultural University, Gazipur Bangladesh hynne ka sngi ba-ar, kila sdang iaka ‘Academic Exposure Training and International Youth Exchange Programme 2022’ kaba san sngi kynthih hynne ka sngi Ba-ar ha NEHU Campus.
Kane ka prokram kadei shi bynta jong ka Youth Exchange Program ban ia phah markylliang ia ki samla na ka jylla bad ka ri Bangladesh ba kin ioh iasam ia ki jingnang jingtip hapdeng jong ki halor kiba bun ki mat bad ban wanrah ia ka jingsuk bad jingiasngewthuh jingmut.
Ia kane ka prokram la plie da u Lamphang ka Iing dorbar ka Jylla bah Metbah Lyngdoh uba la ong baka long ka ba donkam ban pynlong ia kum kine ki program namar ki lah ban iarap ia ki samla ba kin tip shaphang ki jinglong jingman ha kiwei pat ki ri ka pyrthei.
U Bah Metbah ula kdew ba naba bun ki samla na Bangladesh kila wan iashimbynta ha kane ka prokram ha ryngkat ki samla na India, kane kan nang pynkhlain ia ka jingiadei hapdeng jong ki kum ki para marjan.
U bah Metbah ula ong ba kum kine ki prokram kin nang pynshemphang iaki samla ha ki bun ki liang khamtam haba iadei bad ka jinglong jingman jong kiwei ki ri bad kin iarap ruh ba kin sngewthuh ia ki policy jong ki sorkar haba iadei bad ka jingkyntiew iaka pule puthi.
“Kum kine ki program kin pynshlur bad kin iarap iaki samla ban ieng hala ki jong ki kjat bad ban long ki briew ki ban shemphang khnang ba kin lah ban kyntiew iala ki jong ki jylla, ki ri bad ban kyntiew iaka imlang sahlang” la ong u bah Metbah.
