Shillong, Jymmang 31 : U Symbud Myntri Rangbah Bah Sniawbhalang Dhar ula plie paidbah ia ka building jong ka Rilang College ha ka sngi Thohdieng bad pynbna ruh ia ka song jingiarap ba T. 5 lak ban siew tulop ia ki noghikai, haba pynpaw baka pule dangle hapoh ka Constituency kala “iaid shakhmat” da ka jingmih ki skul thymmai, ka JNV campus bad ka skul EMRS.
“Ka pule puthi kan shym la sahkut hajuh hapoh ki constituency jong ngi lane ha ki district. Kala iaid shakhmat” ong u Bah Sniawbha.
“Ha ki phra snem, ngi la ioh ia ki pisa na ka Sorkar na ka bynta ki dorjon ki Iingskul bad la tei thymmai ia bun na ki”.
Ula kren halor ka jingpynkynriah ia ka JNC sha ka district headquarter. “Da ki phew snem ki Khun jong ngi ki hap leit shaduh sha Nongstoin ban pule ha skul JNC, hynrei mynta, ngi la don iala ka jong ka skul JNV ha Mawlamwir, kaba don hangne hi ha Mawkyrwat”.
Halor ka Rilang College, ula pynpaw “Ngi la buh ia u mawnongrim ha u 2019 bad kala iaid kawei ka sienjam hadien kawei, na u snem sha u snem. Kano kano kaba la leh bha, watla ka shim por, kan long kaba kham biang bad kham bha”.
U Bah Sniawbha ula iaroh ia ka thain haba phai sha ka roi ka par. “Ki paidbah ka Mawkyrwat ki don ia ka mynsiem ban iatei lang na ka bynta ka jingbha jong baroh. Ngim shym la wanrah ia ka politics ha ki kam pynroi”.
Ula kular ban pynbteng ia ka jingkyrshan. “Ngan sa leh ia ka jingtei kynroh kaba la pyni sha nga. Lada ngam lah ban pyndep baroh 600 meter shisien leh, ngin leh da ki bynta bynta. Bad ngan synniang T. 5 lak mynta ka taiew ban iarap siew ia ka tulop ki nonghikai”.
“Da ka jingplie ia ka Rilang College mynta ka sngi, Nga ngeit ba ki aplikeshon kin sdang ban wan noh naduh lashai ka sngi. Ka dei ban long ha headline kaba heh- Ka jingtrei shitom jong u MLA ka thain (Bah Renikton Lyngdoh Tongkhar) la lah ban plie ia ka College thymmai, kaban long ka nuksa ia baroh ba kin bud” ula ong.
