Nongstoiñ, Jymmang 31: Ka Dorbar shnong Nonglait kaba hap hapoh ka Hima Mawiang Syiemship, Eastern West Khasi Hills District, ha ka sngi saitjain, ka la plie paidbah ia ka Jingkieng iaid kjat bad ia ka Viewpoint kaba la tip ruh kum ka Remkhla Valley Wahrilang Viewpoint.
La plie paidbah ia kane ka jaka jngohkai lyngba ka video call da u Commisioner secretary ka tnad tourism Dr D.Vijay Kumar. Kiba iadonlang ban sakhi ha katei ka jaka ki kynthup ia ia Deputy Commissioner ka EWKH kong Anita Kharpor, Executive Director Technical MBDA bah G.Kharmawphlang, ADC bah M.Diengdoh, u BDO ka Mawthadraishan bah W.L.Massar, ka Tourism Officer kong S.T.Shylla, ki Ophisar Sorkar ha ka jingdonlang ki nongialam shnong, ki khynnah skul bad ki nongshong shnong.
Ia kane ka jingkieng la tei lyngba ka skhim MBDA bad ka MGNREGA kaba ka mang T. 64,59,270 bad la plie ia u Mawnongrim da ka DC ka kong Anita Kharpor kum ka Kongsan. Ha kane ka jingialang la khap ruh ia u ribon kum ka jingplie paidbah ia kane ka jingkieng bad ia ka jaka jngohkai da u bah G.Kharmawphlang.
Ka Remkhla Valley Wahrilang Viewpoint la khmih lynti ba kan long kawei na ki jaka ka ban khring bha ia ki Nongwan jngohkai pyrthei ym tang na ka Jylla, hynrei nabar ka Jylla bad kiba na bar ka ri ruh kumjuh.
Kane ka jaka ka long kaba itynnad bha bad don harud jong ka Wahrilang bad ki lum kiba itynnad bha kiba iohi kyndiang ia ki lyngkha bad ki pyntha kba. Kane ka jaka ka don sha them jong kawei na ki jaka jngohkai pyrthei kaba paw kaba ju tip kum ka dom Markham ne ka Dom murok viewpoint.
Na ka liang u Commissioner & Secretary Vijay Kumar ha ka video ba ula phah, ula ai khublei kyrpang ia ka Dorbar shnong Nonglait kaba la lah ban plie paidbah noh ia ki lai tylli ki jingkieng iaid kjat bad ka Wahrilang Viewpoint. U la ong ruh ba na ka liang ka tnad Tourism kan iai kyrshan ha kaba iadei bad ka sienjam kaba la shnong ka la shim bad ba un sa wan ban jngoh ruh ia kane ka jaka.
