Shillong, K’lyngkot 23 : U Myntri Rangbah ka Jylla Conrad K Sangma hynne ka sngi Ba-ar, ula plie paidbah ia ka PRIME Hub ha Shnong Wahiajer kaba don ha Thadlaskein Community & Rural Block, West Jaintia Hills.
Kiba la iadonlang ha kane ka sngi ki kynthup ia ki arngut ki Symbud Myntri Rangbah ka Jylla Bah Prestone Tynsong bad Bah Sniawbhalang Dhar, u Myntri ka Tnad Cooperation Bah Comingone Ymbon bad kiwei kiwei.
Haba ai jingkren, u Myntri Rangbah ula ban jur halor ka bynta ba kongsan jong ki Shnong ki Thaw ha ka jingtreikam ba jop kum ka PRIME Hub.
“Ha manla ki Block ka Jylla, kin sa don ki PRIME Hub ki ban don bad ki jingtei bapher bapher, ki ban ai ka jingshakri ia ka jingdonkam ki nongrep” ula pynbna.
U Myntri Rangbah ula kren ruh halor ka jingnang kiew jong ka jingtei ha Wahiajer, kaba dang shu dep pyntrei dang ha ki khyndiat bnai.
Ula ong “ Ka jingpynlut ka long kumba T. 4 klur ban shna ia kane bad kumba phi iohi, ka dei kaba ring bording na ka sngi ban lah pyntreikam ia ka Cold Storage, ki bording bad ki machine. Ka thong jong ngi ka long ban iohi ia ka jinglah ban buh kat kaba lah ia kine ki hub ha kylleng ki jaka ka Jylla ha ki Block bad Constituency kiba don ia ki kynhun ki nongrep kiba treikam”.
Ka Wahiajer PRIME Hub, kaba pynmih ia u shynrai, u syieng, u synsar, ka dei kaba buh ban ai jinghikai bad hikai pyntreikam ia ki kor ka juk sha ki kynhun ki nongrep, ka kynhun ki Longkmie, ki briew ba angnud ban sengkam lajong hapoh ka thain.
Ka jingkut jingmut jong ka Sorkar ban kyntiew arshah ia ka kamai kajih jong ki nongrep kala paw lyngba ki Misssion bapher bapher kum ka mission shynrai, sying, sohphan, tit, musla bad kiwei kiwei.
Ban kyrshan ia ki kynhun nongrep, la air uh ia ka ram treikam ba khlem sut kaba long haduh T. 12.4 klur naduh u snem 2021-23.
