spot_img

Plie u CM ia ka Motherhood Transit Home ban tem ia ka jingkhlad ki Longkmie ba armet

Date:

Share post:

Tura, Nailar 12: U Myntri Rangbah ka Jylla Conrad Kongkal Sangma hynne ka sngi thohdieng, ula plie paidbah ia ka Safe Motherhood Transit Home (ka Jaka sah ba shipor ban iada bad sumar ia ki Longkmie ba armet) ha Asanang Primary Health Centre (PHC) kaba hap hapoh ka Rongram Block, West Garo Hills.

Kane ka Transit Home ka dei kaba la thaw da ka Sorkar kum shibynta jong ka Chief Minister’s Safe Motherhood Scheme ne ka skhim ban ai jingiada bad sumar iaki Longkmie ba armet ban lah tehlakam ia ka jingiap ha ka por kha khun.

Ka State Health Policy 2021, kala ithuh ia ka jingiap jong ki Longkmie ba kha khun ba ka dei ka kam kaba sngew khia bha bad tang ha u snem 2020-2021, haduh 248 ngut ki Longkmie kila iap ha ka jingkha Khun.

Ka Chief Minister’s Safe Motherhood scheme (CM-SMS) ka dei kaba la pyntrei halor ka jingthmu ban bynrap ia ki lad jingiarap na ka bynta ban khate ne pynduna ia ka jingiap jong ki Longkmie ha ka por kha khun.

Haba kren ha ka jingialang, u Myntri Rangbah ka Jylla ula ong ba ka Sorkar kala shimkhia bha halor ka jingai jingsumar ia ki Longkmie ba armet lyngba ka MOTHER Programme bad ka Safe Mother Scheme ka dei kaba la wanrah ban pynshlur ia ki Longkmie ba kin leit kha khun ha ki jaka ai jingsumar ban lah pynduna ia ka jingiap.

U Myntri Rangbah u pyntip ba kane ka skhim ka don haduh saw bynta- (a) Ban buh ia ka Transit Home ia ki Longkmie kiba don ha ka jingma ha ka por armet. Ban pynbiang ia ka bam bad ai jaka lem ia ki Khun ki Kti jong ki.

(b) Ban pynbiang ia ki kali da ka jingiatreilang bad ki riew shimet ba kin leit shaw bad leit on ia ki Longkmie bad ia ki dkhot ka Iing jong ki.

(c) Pynshlur ia u Lok ne bahaiing hasem ban synran ia ka Longkmie bad ban sah bad ka ha kaban yn ai ia ka bainong sngi ba T. 1000 uwei u nongap.

(d) Ban ai khuslai ia ka Shnong ba pyntrei bha ia ka Chief Minister’s Safe Motherhood Scheme hapoh kawei pa kawei ka PHC ka ban long shisien ha ka shisnem.

U Myntri Rangbah ila pyntip ba haduh 80 tylli ki PHC kila dep ban buh ia ka Motherhood Transit Home ha kylleng ki jaka jong ka Jylla.

Kine ki 80 tylli ki PHC kila pynbeit ia ki kali ban iarap ia ki Longkmie ba armet bad ka Sorkar kala mang ia ka song pisa ba T. 36 klur naka skhim da kaba wanrah lang hajuh ia kiwei ki prokram kynthup ka JSY bad JSSK.

U Myntri Rangbah u pyntip ba ka jingiap jong ki Longimie ba armet kala hiar mynta palat 35% tang ha kine ki hynriew bnai bala leit noh haba ianujor bad u snem bala lah.
“Ka jingiap jong ki Khunlung ba dang kha ka long 29 % na ka National Average (jingkhein kyllum lang hapoh ka Ri) ba kot 28% jong u snem 2020-2021. Ngi la kut jingmut ban pynduna noh ia ka jingiap na ka National Average” ula ong.

Share post:

spot_img
spot_img

Popular

More like this
Related

Kynnoh ka HYC ba pyndonkam bakla ia ka MMMRF ban pynjyrngam biang ia ka mei mariang

Shillong, Jylliew 28: Ka Hynniewtrep Youth Council (HYC) ha...

Kynnoh ka HNLC ba pyndonkam ka MLP ia ki lui lui kum ki ‘Trophy’ ban pynphriang khubor lamler

Shillong, Jylliew 28 : Ka Hynniewtrep National Liberation Council...

Yn mihkhmat ka Samla Aibankyrmen ia ka Jylla sha ka National Arm Wrestling na WKH

Nongstoin, Jylliew 27 : Ka samla Aibankyrmen Wanñiang, 22...

Pdiang ka Iingkashari iaka mukotduma ka SRT pyrshah ia ka jingai ST ka Tnad Social Welfare

Shillong, Jylliew 27 : Ka Iingkashari High Court ha...