Shillong Nailar 12: Ka rakhe ainam da ka khusnam na ka bynta ka thohdur ba la tip kum ka Crystal Gayle Memorial Award 2022 la pynlong ha paki dulan jong u Lat ka jylla bad ia kane ka khusnam la ioh da u Bah Phaibhakupar Kharlukhi halor ka jingtbit ba kynsai ha ka thohdur ka ba phalang ia ka jingim jong ki briew ha shnong ha thaw ia ka ba ym ju kham jia shuh ha ka juk mynta.
U Bah Phaibhakupar Kharlukhi u la ioh ia ka Khusnam Mattithaw kadei halor ka jingtbit ba kynsai, ka jingjanai bad sani ha ka kam jong u kala long u mawmer ban jop ia ka thong jong ka khusnam mattithaw ban kynmaw tympang ia ka samla Crystal Gayle ka ba la khlad naduh u snem 2017.
U Bah R V Warjri, u nongkit-tiensyiem barim jong ka Ri India sha kylleng ka pyrthei kum u kongsan u la aiti ia kane ka khusnam sha u Phaibhakupar, ha kaba la iadonlang u N Munish Singh, Zonal Director, Indian Council for Cultural Relations, Shillong, Bah A Lakiang, Deputy Secretary jongu Governor bad u Bah Raphael Warjri, Chief Creative Director, Riti Academy of Visual Arts.
Kum ban kynmaw tympang ia ka kam jong u Bah R V Warjri ha ki Ri jong ka dewbah Europe, u la kren mardor ‘Ka Saiñkylla (Revolution) jong ki Ri Sepngi ka la kiew skong da ka khih mynsiem ha ka mattithaw (art movement) ka ba la kyrsoi da ka jingshitrhem bad len lade jong ki barikor, ki kaitor, ki myllung bad ki thohjer thohnam’. Ha kaba nam ia ki kam jong ka synjuk ki barikor, Riti Academy, u Bah Warjri u la kyntu, ‘Ka mattithaw ka dei ka ba snoh rdin bad ki jynthaw ha ka mariang ba ki paidbah ki dei ban tip la ka kamram ban pynneh pynsah bad ba ym dei ban tip tang kumno ban dawa ia la ka hok khlem da kitkhlieh ia la ka khyndew bad ka mariang ha la Ri lajong’.
