Shillong, Nailar 12: U President ka United Democratic Party (UDP) Bah Metbah Lyngdoh ula ong ba ka UDP ka long kaba la pynkhreh ban iakhun pyrshah ia kano kano ka Seng Sain Pyrthei ha ka elekshon MLA-2023 bad kam pat rai satia ban iatehlok badno badno ruh ha kane ka elekshon.
Haba pynpaw ia ka jingartatien ba kan dang neh ka jingiatreilang bad ka NPP lane ka Regional Alliance bad ka HSPDP, u Bah Metbah ula ong ba ka UDP kan ap shuwa ban da kut kane ka samoi treikam ba mynta.
“Hadien ba kut kane ka samoi ba mynta lane ynda ngi la poi sha kane ka bynta, ngin sa peit ia kaei kaba jia” ula ong.
Haba kylli, u Bah Metbah ula ong ba ka UDP mynta ka kynti kan sei ia ki kyrtong kiba iakhleh lang naduh ki Nongmihkhmat bad ki kyrtong kiba dang samla rangbah hynrei kaba hakhmat eh ka long ba kine ki kyrtong kin dei kiba don jingmut shisha ban trei na ka bynta ki paidbah ka Jylla.
Haba phai sha ka jingpynbna ia ki kyrtong, une u Nongialam ka UDP ula ong baka State Election Committee kan sa shim rai ia kane ka bynta haba pynpaw ia ka jingkyrmen ba kan ym slem shuh ba ka SEC kan pynbna ia ka thup kyrteng ba nynkong.
Halor ka jingwan ka All India Trinamool Congress (AITC), u Bah Metbah ula ong ba ka UDP hi kam iohi jingma satia na ka AITC hynrei kumba la ong, ka UDP ka long kaba la khreh ban iakhun pyrshah ia kano kano ka party.
