Shillong, Risaw 28 : U Myntri Rangbah ka Jylla Conrad K Sangma ha ka sngi Ba-ar, ula plie paidbah ia ka Mini Secretariat ba dang shu tei thymmai bad ka Circuit House ha Pynursla, kaba long uwei pat u mawmer ha ka jingpyrshang jong ka Sorkar ban pynkhlain ia ka synshar khadar bad ban wanrah ia ka jingshakri paidbah khamjan sha ki nongshongshnong.
Ha kane ka jiingialang la iadonlang u Symbud Myntri Rangbah Bah Prestone Tynsong, u Chief Secretary Dr Shakil P Ahammed, Myntri ka Arts & Culture Bah Sanbor Shullai, MLA ka Sohra Bah Gavin M Mylliem bad kiwei kiwei.
Haba ai jingkren, u Myntri Rangbah ula niew ia kane ka project kum ka jingpynpaw ia ki jingthmu jong ka Sorkar Jylla ban wanrah ia ka synshar khadar kaba treikam bha, ban pynjanai ia ka jingshakri paidbah bad ban iasam marbiang ia ka roi ka par ha baroh kawei ka Jylla.
“Ka Mini Secretariay bad ka Circuit House ha Pynursla ka pyni ia ka jingkut jingmut jong ka Sorkar ban pynpoi ia ka synshar khadar sha kylleng ki jaka bad ban pynbiang tarajur ia ka jingkiew shaphrang” ong u Conrad haba bynrap “Ngi kwah ban wanrah ia ka On-stop system ha kaba ki nongshongshnong kim donkam shuh ban mareh na kawei ka Ophis sha kawei pat. Ka thong jong ngi ka long kaba suk-ka synshar khadar kaba paka bad ka jingshakri ia u paidbah ha man ki khyrdop iing”.
Haba sot ia ka jingpynpaw u nongthoh kot Shiv Khera ban leh ia ki kam da ka lynti kaba pher, u Myntri Rangbah ula kdew ba kumno ka jingpynkylla ha ka synshar khadar kala wanrah ia ka jingkiew kaba da buh jingkhein.
“Ha ka por ba ngi sdang ha u 2018, ka jingpyntreikam ia ka MGNREGS ka long hapoh ka T.500 klur. Mynta, ka kot jan T.2000 klur-ym namar ka skhim thymmai, hynrei namar ngi pyntrei ha ka lynti kaba pher ia ka skhim. Ha ka MPAY ruh, ka nombor kala kiew na ka 4000-5000 iing ha ka shisnem sha ka 1.5 lak manla u snem” ula ong.
Haba batai ia ka jingmut ha lyndet ka jingtei ia ki Mini Secretariat, u Conrad ula ong ba baroh ki Tnad Sorkar ha ki kyrdan SubpDivision kin treikam noh hapoh kawei ka tnum ban pynthikna ia ka jingsted, ka jingiatreilang ha ka jingai jingshakri.
“Kat hung jong ngi ka long ba u briew u lah ban aiti ia ki kot ki sla ha ka Ophis ba don marjan bad sa lum pat ia ki hapoh ka shitaiew lane shiphew snem-khlem da donkam ban leit shaduh sha ki Ophis ki DC” ula bynrap.
U Myntri Rangbah ula pynpaw ia ka jingsngewnguh ia ki Shnong ki Thaw khamtam ka Raid Shabong, kaba la aiti sngewbha ia ka jaka na ka bynta ka project.
“Kane kam dei tang ka jaka-ka dei ka khubor ba ki Shnong ki Thaw bad ka Sorkar ki lah ban iatreilang na ka bynta ka jing bha kaba kham khraw. Kaei kaba phi la leh mynta ka sngi kan dei kaban sah jingkynmaw pateng la pateng” ula ong.
U Conrad ula ai ka jingiaroh ruh ia u Symbud Myntri Rangbah Bah Prestone Tynsong uba la shimkhia khlem shongthait ban pynurlong ia ka project.
Haba ai jingkren, u Symbud Myntri Rangbah Bah Prestone ula ai khublei ia u Myntri Rangbah ba ula kynthup ia ka Pynursla ha ka mat pynroi pynpar ka Jylla bad iaroh ruh ia ka jingiatreilang kum ka kynhun kaba pynurlong ia kane ka project.
“Kane kan sah ha ki khana jong ka Pynursla Civil Sub-Division” ula ong haba niew ia kane ka jingplie kum ka khyllipmat kaba sngew sarong ia ki paidbah jong ka thain.
