Shillong, Naiwieng 21: U Myntri Rangbah ka jylla u Conrad K Sangma hynne ka sngi Palei, ula plie paidbah ia ka Mawsmai Banquet Hall bad 32 tylli ki kamra sah kiba kyrpang ne ki Luxury suites kIba la tei thymmai ha Hotel Polo Orchid Resort kaba don ha Sohra, East Khasi Hills.
Kiba la iadonlang ha kane ka sngi ki kynthup ia u Myntri ka kam jngohkai u Bah Paul Lyngdoh bad u MLA ka Sohra u Bah Gavin Miguel Mylliemgap.
Ka jingpyniar ia katei ka jaka sah ka dei kaba la shimkhia namar ka jingwan tuid ki nongjngohkai sha Sohra bad katei ka jingtei kaba thymmai ka phai sha ka jaka kaba don ka Kshaid Mawsmai.
Haba plie ia kine ki kamra sah kiba kyrpang bad ia ka Banquet Hall, u Myntri Rangbah ka jylla u Conrad K. Sangma ula iaroh ia ka Polo Towers Group kaba la kynthup ia kitei ki jaka sah kiba remdor ha ka Orchid Resort Sohra.
“Ka jingthaw ia ki jingtei kiba thymmai ha ka kam jngohkai da kiba don bynta ha ka kam ha ka jylla, ka pyni ba ka kam jngohkai kala nang roi bad kiew shaphrang bad ka dei ruh ka jingpynkhreh kaba iahap bha ia kiba wankai” ong u Myntri Rangbah.
Haba iaroh ia u Chairman jongka Polo Towers Group ia ka jingshim ia katei ka sienjam, u Myntri Rangbah ula ong, “Katei ka sienjam kam dei tang ba ka kyntiew ia ki jingdon jingem ha ka kam jngohkai hynrei ka pyni ruh ia ka jingiatreilang hapdeng ki shnong ki thaw, ka sorkar bad kiba don bynta lang ha ka kam. Ka jingpynkhlain ia ka jingshaniah bad ki nongshong shnong ka long ka dawbah ban tei bad ban kyntiew irat ia ka kam jngohkai”.
Ula iaroh ruh ia katei ka kynhun kaba la sdang ruh ban kynthup ia ki jingbam tynrai, ka kolshor bad ia ka riti dustur, ha kiba bun ki bynta jong katei ka Resort.
“Mano mano ruh kiba leit sha katei ka Resort kin ioh ia ka lad ban tip shaphang ka Meghalaya,” ula bynrap.
Haba kren shaphang ka jingkiew ka jylla ha ka liang ka kam jngohkai pyrthei bad ka jingnoh synniang sha ka GDP, ula pyntip ba ka kam jngohkai kala don ia ka bynta kaba khraw ha kaban wanrah ia ka jingkylla ha ka ioh ka kot jong ka jylla.
“Ha ki snem kiba la leit, ka ioh ka kot ka Meghalaya ka long tang kumba 4.7 Billion US Dollar. Ha kine ki 5 snem kiba la dep, ngi la lah ban kyntiew ar shah ia kitei ki nombar bad ka jingkiew ka jong ngi ka long kumba 10.5 percent. Kala don ka jingbei tyngka kaba heh ha ka kam jngohkai bad ngi khmih lynti ban kynjoh sha ka 10 Billion US Dollars hapoh u snem 2028” ula bynrap.
Ula pyntip ba ka sorkar ba kam kwah tang ban shu kynjoh ia ka thong hynrei ka rukom treikam ka jongka ka long ban pynthikna bad kan don ka jingkiew ha ka ioh ka kot bad ka roi ka par kaba salonsar kaban kynthup ia ki briew kiba don ha ki bynta ki bapher bapher.
Ula pyntip ba la jan T. 2000 Klur la bei tyngka ha ka jylla ha kine ki 3 snem kiba la dep bad kumba T.4000 Klur yn bei tyngka ha ka kam jngohkai ha kine ki snem kiban wan.
“Ngi la lah ban thaw ia ki lad ban ai kam ai jam kaba la jan kot sha ka 50,000 ha kine ki lai snem ba la dep. Ngi khmih lynti ban pynkiew arshah ia katei, sha ka 100,000 (1 lak) tylli ki kam ha ki 4-5 snem kiban wan, lyngba ka jingbei tyngka kaba heh,” ula ong.
