Shillong, Nailar 30: U Myntri Rangbah ka jylla u Conrad K Sangma ha ka sngi Saitjain u la plie paidbah ia ka CM Connect Centre ha PA Sangma Stadium Tura, West Garo Hills.
Ka Centre kan long kum ka rynsan kaba kyrpang na ka bynta ki nongshong shnong ban phone beit beit ha u “1971 – CM Connect” ban pynpaw ïa ki jingeh, ki jingai jingmut na ka bynta ban lah pynbeit kloi da ka Sorkar.
Ha kane ka sngi la don lang ruh u Thomas A. Sangma, Lamphang ka Ïing Dorbar Thaw Aiñ ka Jylla, u Vibhor Aggarwal, IAS, Deputy Commissioner, West Garo Hills, u Shri Banteilang J. Kharshandi, MCS, Nodal Officer jong ka CM Connect, ryngkat ki heh ophisar, ki nongmihkhmat jong ka CM Connect bad ka team theMeG.
Haba kren ha kane ka sngi, u Myntri Rangbah ka Jylla u la ong ba ka CM Connect kam dei tang ka prokram, kam dei tang ka phone, lane tang ka ophis hynrei ka dei ka jingmut bad ka jingthmu jong ka Sorkar.
U Conrad ula batai ba ia kane ka jingthmu la tei halor ka nongrim ba u Myntri Rangbah ka Jylla bad ka Sorkar ki dei ban iai don ka jingiadei bad ki paidbah. “Lada u khlieh jong ka Sorkar um lah ban pyniasoh bad sngewthuh ia ki jingeh jong ki paidbah, ka pynmih ia ka jingkhanglad ha ka jingiakren. Kum kane ka jingkhanglad ka lah ban khanglad ia ngi ban pynbeit ia ki mat kiba donkam shisha ia ki nongshong shnong jong ngi bad ka lah ban wanrah ia ka jingsynshar kaba khlem pynpaw ia ki jingdonkam jong ki,” u la ong.
U Myntri Rangbah ula batai kumno ka CM Connect kan treikam lyngba lai tylli ki lad ki lynti kiba kongsan, kata ka jingpynbna ba la pynïaid da ki kor teknoloji kan ailad ïa ki nongshong shnong ban wanrah ïa ki jingeh bad wad jingtip lyngba daka ba phone ha u number 1971 khlem jingsiew, ki jingshakri lyngba ka WhatsApp, ki chatbot, bad ka website jong ka CM Connect.
Ia kine ki jingeh yn buh jingthoh, buddien bad phah sha ki tnat ba dei peit ban pynbeit ha ka por kaba biang.
Kaba ar, ka jingïakren beit bad ki nongshong shnong kan dang ïai bteng ban long u mawjam jong ka jingthmu, ha kaba u Myntri Rangbah ka Jylla un ioh iakren bad ki paidbah.
“Ka CM Connect kam dei shaphang ki jingkren—ka dei shaphang ka jingsngap. Ngi lah ban pyrkhat ba ngi leh ia kaba dei hynrei lymda ngi iohsngew beit na ki paidbah, ngim lah ban tip shisha,” u la kynthoh.
Kaba lai, yn buh ia ki CM Connect Centre ha baroh 56 tylli ki block jong ka Jylla.
Katba ki ophis kiba don ha ka kyrdan block kin treikam ha ka rukom kaba kham rit, ki jaka treikam jong ki distrik kin buh ïa ki jaka ba la pyndap pura ïa ki nongtrei ban ïarap ïa ki nongshong shnong.
Katba nang mih ki sngi, kine ki jaka kin sa nang kiew ban jingshakri iaki paidbah kum ban ai iaki kot ki sla, ki aplikeshon, ki skhim sorkar, bad kiwei kiwei ki jingshakri kiba donkam.
U Myntri Rangbah ka Jylla u la pynpaw ba ka CM Connect ka dei shaphang ka jingpynroi ïa ka kolshor jong ka jingsngap bad ka jingïashim bynta, ban pynthikna ba ka jingsynshar kan dang long kaba pynshong nongrim ha ki briew.
Haba kren sha ka kynhun CM Connect, u Myntri Rangbah ula kyntu ia ki ban shakri ia ki nongshong shnong da ka jingburom, ka jingsbun, bad ka jingsngewthuh jingmut.
“Haba phi kren sha ki paidbah, phi kren na ka bynta jong nga. Ki nongshong shnong kiba leit shapoh ka ophis jong ka CM Connect ki dei ban sngew ba la pdiang sngewbha iaki. Lada ki sngew ba la iehnoh ne lehbein ia ki, te ka jingthmu hi jong kane ka jingthmu ka la shah rem noh,” u la ong.
U la pynkut da kaba pynkynmaw biang ia ka jingthmu jong u ban pynlong ia ka jingsynshar kaba kham suk, kaba shai, bad kaba shimkhia lyngba ka CM Connect, da kaba kdew ba watla ka jingleit kan shim por, hynrei ka thong ba kongsan ka long ban pynlong ia man la ka jingshakri sorkar kaba lah ban ioh lyngba kine ki jaka.
Naka liang u Lamphang ka Iingdorbar Thawain u Thomas A. Sangma haba kren ha kane ka sngi ula ong ba kane kadei ka khyllipmat jong ka jingsarong bad jingkmen kaba khraw bad ong ba kane ka Centre ka dei ka mawjam kaba kongsan na ka bynta ka synshar khadar ha kane ka thaiñ bad kumjuh ruh ha ka jylla.
U la ban jur ba ïa ka jingthmu jong ka CM Connect la thmu ban pyndap ïa ka jingïapher hapdeng ka sorkar bad ki nongshong shnong, da kaba pynskhem biang ïa ka jingkular jong ka jylla ïa ka synshar paidbah kaba rit paid, ka jingsynshar kaba shai, bad ka jingïatreilang jong ki nongshong shnong kaba don jingmut.
U la bynrap ba ka Centre kan pynkupbor ïa man la ka bynta jong ka imlang sahlang—ki nongshong shnong, ki samla, ki nongrep, ki nongseng kam seng jam, bad ki kynhun jong ka imlang sahlang—da kaba ai ka lad ban pynpaw ïa ki jingeh, ban kylli jingkylli, bad ban wad ïa ki lad ki lynti beit na ka bor synshar.
Da kaba pynpaw ïa ka teknoloji kum ka jingthmu, u la kdew ba ka CM Connect ka ai ki lad ki lynti kiba bun na ka bynta ki briew ban ïatreilang—lyngba ki laiñ jingïarap, ki jingthoh, ki lad pathai khubor online, bad ki lad ban pynthikna ba ïa ki jingeh la pynbeit da kaba shai bad kaba treikam bha.
U la pynpaw ruh ba kane ka jingthmu ka pynkhlain ia ka bynta jong ki nongtrei mon sngewbha ha ka imlang sahlang bad ki samla kum ki nongmihkhmat jong ka jingsynshar kaba kynthup lang ia baroh.
Hashuwa kane u Vibhor Aggarwal u la batai ia kane ka Centre kum ka sienjam kaba kongsan ha ka jingiatreilang bad ki nongshong shnong, da kaba kdew ba ki jingshakri bad ki skhim sorkar ki long kiba pynshong nongrim ha ki nongshong shnong daka ba plie ia ka CM Connect Centre.
Naka liang u Bah Banteilang J Kharshandi u la pynpaw ïa ka jingïaid lynti jong ka CM Connect naduh ba la sdang ïa ka ha ka 15 tarik Rymphang 2024.
U la pyntip ba ar tylli ki nombar ba khlem jingsiew—1971, kaba pynsah kynmaw ïa ka snem long jylla jong ka Meghalaya, bad 1800-345-651—ryngkat bad ka WhatsApp ba kyrpang (94363-94363) ki ai ïa ki nongshong shnong ïa ki jaka ba bun jait ban ïoh ïa ki.
Ki jingshakri ki don ha ki phra tylli ki ktien: Phareng, Khasi, Garo, Pnar, bad Hindi. Ka jaka phone kaba pawnam ha ka pyrthei kaba don 25 ngut ki nongtrei ba la shah hikai ka treikam man ka sngi naduh ka por 8 baje mynstep haduh ka por 8 baje janmiet, katba 470 ngut ki nongtrei mon sngewbha jong ki shnong ki pynïar ïa ki jingshakri wat sha ki jaka ba jngai tam jong ka jylla.
Naduh ba la sdang, ka CM Connect ka la ïoh ban ïoh jingtip haduh 38,266 tylli ki jingïakynduh jong ki nongshong shnong, ha kaba 31,891 na kine ki dei ki jingkhot phone, bad ka la lah ban pynlong ïa ki hynriew tylli ki prokram ïakynduh paidbah ha ki block bapher bapher.
Ka CM Connect Centre ha Tura ka dei shi bynta jong ka jingpyrshang kaba kham jylliew ban pynjylliew ïa ka jingïadei bad ki nongshong shnong bad ban thaw ïa ka rukom synshar kaba shimkhia, kaba don jingkitkhlieh ha kylleng ka jylla.
