Shillong, Nailar 16: U Myntri Rangbah ka Jylla Conrad K Sangma bad u Myntri kam Jngohkai Bah Paul Lyngdoh ha ka sngi Balang, ula plie paidbah ia ki jingtei jong ki kam jngohkai bala jer kyrteng “Travellers Nest” ha ka shnong Kyiem, Mawphlang, East Khasi Hills.
Kane ka Travellers Nest ka don haduh 5 tylli ki cottage bad ka restaurant ban pynbiang ia ki jingdonkam jong ki nongwan shangkai.
Ka Mawphlang ka dei kaba la bna nam halor ka jingdon ia ka khlaw kyntang bad ka dei ruh kawei ka jaka jngohkai kaba la khring bha ia ki briew ba nabar ka Jylla. Ka Mawphlang ka jngai kumba 28 km na Shillong.
Kane ka jingplie ia kine ki jingtei ka dei ka mawmer ba kongsan ha ka jingpyrshang jong ka Sorkar ban pynkhlain ia ka jing iatreilang jong ki Shnong ki Thaw ha kaban kyntiew ia ki kam jngohkai pyrthei.
Haba plie ia kine ki jingtei, u Myntri Rangbah ula banjur halor ka jingkongsan ban iashimbynta jong ki shnong ki thaw ha kaban kyntiew ia ka ioh ka kot jong ka Jylla.
“Ka bor jong ngi ka song ha ka jingiashimbynta lang ki shnong ki thaw, kaba ngi la kyrshan ha kaban kyntiew ia ka ioh ka kot” ula ban jur.
Haba kren halor ka jingkitkhlieh lang jong baroh ki kynhun kynthup ka Sorkar, ki Shnong ki Thaw bad ki Nongshongshnong, ula ong “Ka Meghalaya kan ym lah ban kynjoh ia ka jingkiew shakhmat tang da ka jingtrei ka Sorkar. Baroh ki kynhun ki don iala ka bynta ban leh bad ban ithuh ia kine ki bynta haba buh ia ka thong hakhmat eh ha ka jingmut jingpyrkhat ka long kaba kongsan bha”.
Haba kren halor ki kam jngohkai, u Myntri Rangbah ula pynpaw ia ka jingkyrmen jong ka lawei halor ki bynta bala shim kum ka “Travellers Nest”.
“Ka kam jngohkai ka dei ka kam ba kongsan bha ia ngi. Ka thong jong ngi ka long ban thaw ia ka lad iohkam iohjam ba kot 1 lak ngut ha kane ka kam lyngba ki jingsengkam jong ki kynhun bapher bapher” ula bynrap.
U Myntri Rangbah ula kren ruh halor ka program ba dang shu pyllait thymmai-ka CM-ELEVATE programme kaba tyrwa ban ai subsidy naduh 30% haduh 75% ia ki project ba thmu ban pyntrei da ki nongsengkam lajong, ki Self Help Group bad kiwei kiwei ki kynhun.
“Ka thong jong ka program ka long ban pynkhlain ia ka ioh ka kot lyngba ki sienjam bapher bapher ba kynthup naduh ki cinema hall sha ki health club bad ki project kam jngohkai” ula bynrap.
Haba pyntip ia ka jingkongsan ban pynbha ia ki surok hapoh ka Jylla , u Conrad ula ong ba ka jingshna pynba ia ka surok na Mawphlang sha Weiloi ka dei ka jingai sakhi jong ka Sorkar halor ka jingkut jingmut ban buh hakhmat eh ia ka kam ban pynkhlain ia ki lad pyniasoh lyngba ki surok hapoh ka Jylla.
Ha kane ka sngi, u Myntri Rangbah ula pyllait paidbah ruh ia phra tylli ki Prime Tourism Vehicles ne ki kali kit nongshang kai pyrthei.
Ia kane ka project “Travellers Nest” project ha Kyiem la bei tyngka da ka Meghalaya Age Limited (MAL) lyngba ka Meghalaya Rural Tourism Cooperative Federation Ltd, kaba la kot haduh T.94 lak.
Pule ruh: Assam : Kem ki Pulit ia u Heh BJP halor ka jingiap ka Nongialam ka BJP Kisan Morcha
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
