Shillong, K’lyngkot 17 : Ha ka jingpynkut ia ka jingwan iuhkjat ba lai sngi jong ka sha Jylla, ka President ka Ri Droupadi Murmu hynne ka sngi Balang, kala plie paidbah ia ki motdur jong ki laingut ki khla wait ka Jylla-u Tirot Sing, U Kiang Nongbah bad u Pa Togan Sangma ha Raj Bhavan, Shillong.
Ia kine ki motdur la thaw bad shna da ka Riti Academy of Visual Arts.
Ia ka President la synran da u Lat ka Jylla Phagu Chauhan, u Myntri Rangbah ka Jylla Conrad K Sangma, ka Myntri ka Koit ka Khiah Kong Ampareen Lyngdoh lem bad ki Heh Ophisar bala ialam da u Chief Secretary Bah DP Wahlang.
Haba plie ia kine ki motdur, la iathuh khana ruh ha ka President halor ka bynta jong kine ki khla wait ha ka jingiakhun pyrshah ia ka jingsynshar ka Sorkar Bilat, kaba lam sha ka jingpha iala ka jingim na ka bynta ka Ri.
Shuwa ba kan mih na Shilllong, ka President kala thung ruh ia u dieng ha Raj Bhavan.
Ha ka sngi ba nyngkong ba ka wan iuhkjat kata ha ka 15 tarik, ka President kala plie pyrda ia ka 5th Meghalaya Games ha Tura bad ha ka 16 tarik, kala ai jingkren sha ki dkhot ki Self Help Group (SHG) ha Baljek Airport, Tura bad buh mawnongrim jong ka Integrated Administrative Complex ba thymmai.
Ha kane ka juh ka por, ka President kala ai jingkren ha ka jingialang ba long ha Mawphlang bad plie paidbah lyngba ka kor online ia ka surok Rongjeng-Mangsang-Adokgre bad surok Mairang-Ranigodown-Azra nalor ka jingbuh mawnongrim ia ka project Shillong Peak Ropeway bad ki jaka sah ki nongshangkai pyrthei ha Kongthong, Mawlyngot bad Kudengrim.
