Agartala, Risaw 13: Ka President Droupadi Murmu hynnin ka sngi Balang kala plie ia ka judicial academy kaba dang shu dep tei thymmai hapoh Narsingarh ha ka nongbah Agartala ka Tripura.
Nalor kata ka president kala plie ruh ia ka dur nongmuna ne model jong ka Tripura campus na ka bynta ka National Law University.Ka president Murmu kala wan poi ha Tripura hynnin ka sngi Balang ha ka jingwan jurip ba arsngi sha kane ka jylla.
Ka Murmu kala wan poi ha Maharaja Bir Bikram (MBB) airport ha Agartala ha ka por 11:15 mynstep ha kaba kala ioh ia ka jingpdiang sngewbha ha kane ka jaka lyngba u Myntri Rangbah (CM) ka Tripura u Dr Manik Saha.
Shibynta ban pynpaw ka jingpdiang burom ia ka president ka ri, kala don ruh ka jingiashim bynta ha ka Guard of Honour da ki pulit Tripura hadien ba kala wan poi ha Agartala.
Hadien ka President Droupadi Murmu kala pynlong ruh ka jingleit jurip ia ka central tea processing factory ha Durgabari Tea Estate hajan Agartala.Ha kane ka jaka ka Murmu kala ioh ruh ban iamir jingmut bad ki nongtrei sla sha kiba don ha kane ka jaka.
