New Delhi, Risaw 03: U Chief Election Commissioner (CEC) u Rajiv Kumar ryngkat bad u Election Commissioner u Anup Chandra Pandey hynne ka 3 tarik u Nailur kila plie ia ka Prokram ai jingtip na ka bynta ki nongthep vote kaban pynlong baroh shi snem, ka ‘Matdata Junction’ ha ka jingialang kaba la long ha Akashvani Rang Bhavan, New Delhi.
Ka ‘Matdata Junction’ kadei ka Radio Series kaba don 52 bynta ba la pynmih da ka Election Commission of India, ha ka jingiatreilang bad ka All India Radio.
U CEC Rajiv Kumar u la ong, ka prokram Matdata Junction, kan long ka rynsan kaba khlain ban pyniasoh bad ki nongthep vote ha kylleng ka ri bad kadei ka prokram kaba donlang iaki jingtip bad jingpynbyrngia bad yn ai jingtip ia ki paidbah shaphang ki kam ba iadei bad ka elekshon ha ka jingpynlong ia ka elekshon kaba laitluid, ba shai bad kaba khuid.
U la iaroh ia u Actor u Pankaj Tripathi uba long ruh u nongmihkhmat ka ECI ban wanrah ka jingpynsngewthuh hapdeng ki nongthep vote, u CEC bad ula pynbna ba u PankajTripathi, yn long u nongmihkhmat ia ka Election Commission ha kylleng ka ri da kaba kynmaw ia ka jingtrei borbah jongu ha ka kam bad khamtam ha kaban ai ka jingkyrpad paidbah ha kylleng ka ri.
Katba u Anup Chandra Pandey ula ong, ba naduh ki por mynshuwa, ka All India Radio ka la khring iaki briew kum ka nongiathuhkhana da ki sur kiba sngewtynnad bad ka jingpynkhlain ia ka synshar paidbah bad naduh ki elekshon kiba nyngkong, ka AIR kala ai iaki jingtip sha ki briew ha kylleng ka ri.
Katba u Pankaj Tripathi, u la iaroh iaki sienjam ka ECI ban iajan bad ki nongthep vote bad ula kyntu ia ki samla ba kin iashimbynta ha ki kam elekshon ba kin pyni ia ki rai jongki bad ba kin pyniohsngew ia la ka sur.
Ka Director General (Media) ka Sheyphali Sharan kala ong ba ka ECI & AIR kiba la pawnam namar ka jinglong khuid bad ka jingiadei bad ki briew, kila iatreilang ban pynthikna ban ai jingtip sha baroh.
Ia kine ki prokram ba 15 minit yn pynmih man ka sngi Thohdieng hapdeng ka por 7- 9 baje mynmiet ha ka All India Radio Network kaba don 25 tylli ki FM station, 4 tylli ki FM Gold station, 42 tylli ki Vividh Bharati Station bad 159 tylli ki primary channel/local radio station ha ki 23 tylli ki ktien kiba long ka Assamese, Bengali, English, Gujarati, Hindi, Kannada, Kashmiri, Konkani, Malayalam, Manipuri, Marathi, Nepali, Oriya, Punjabi, Sanskrit, Sindhi, Tamil, Telugu, Urdu, Bodo, Santhali, Maithili bad Dogri.
Lyngba kateo ka prokram yn kren shaphang ki bynta bapher jong ki elekshon, ka jingpynrung kyrteng ki nongthep vote, ka jingthep vote da ka jingtip bad da ka jingkhuid, ka jingkordor jong ka vote, ki elekshon kiba pdiang ia baroh, ka Model Code of Conduct, ki IT Application, ki EVM, ki jingiathuhkhana jong ki ophisar ba dei peit ia ka kam elekshon, ki BLO bad kiwei kiwei.
Ban pynshlur ia ki briew khamtam ia ki samla bad kito kiba leit thep vote nyngkong ba kin shim ia ki rai kiba shai haka por elekshon, ban ai jingtip lyngba ki drama, jingiathuhkhana, Quiz, ki interview jong ki riewshemphang bad ki jingrwai ba pynmih da ka SVEEP (Systematic Voters’ Education and Electoral Participation) Division jong ka ECI.
Yn don ka bynta ba nyngkong jong ka prokram halor ka phang ‘Voter Registration’ ha ka 7 tarik Risaw, 2022 ha ka por 7:25 mynmiet bad ki nongshong shnong ki lah ruh ban sngap ia ka prokram ha ka ‘Twitter on @airnewsalerts bad @ECISVEEP, News On AIR’ App bad ki channel YouTube jong ka ECI & All India Radio.
