Shillong, Naiwieng 25: Ki Pulit ka Assam Forest Guards jan man ka por ki donkti ban pyndik ia ngi, lada ngi leit donkam sha ki pynthor kba ban trei ia ka kam rep kam riang.
Ia kane la pynsngew da uwei u riewpaidbah jong ka shnong Mukroh West Jaintia Hills sha u DGP ka Meghalaya Dr. LR Bishnoi haka por ba u leit jurip ia katei ka shnong ban lap iaki jingshisha halor ka jingjia haka step jong ka 22 tarik mynta u bnai.
U DGP ka Meghalaya Dr. LR Bishnoi u la leit shapoh ka shnong Mukroh kaba jngai kumba 110 Km napoh ka nongbah Shillong bad ha kane ka jingleit jurip ia katei ka shnong u la ioh ruh ban iakren bad ki riew paidbah ban ioh jingtip kham bniah haba iadei bad ka jingjia haka 22 tarik kaba la wanrah ka jingduh noh ki 5 ngut ki mynsiem briew.
“Man ka por haba ngi kit iaki mar rep na ki pynthor bad lyngkha, ki Pulit ka Assam Forest Guards ki pyndik beit bad ki dawa pisa ruh daka ba ong ba hap siew khajna khlaw bad lada ngim lah ban siew iaka khajna ngim lah ban kit iaki mar rep” la ong uwei u nongrep napoh ka shnong Mokoilum kaba jngai kumba 10 km napoh ka shnong Mukroh.
Uwei u riewpaidbah u la ong ba ki paidbah ki im hapdeng ka jingtieng bad kane kam dei tang namar ka jingjia haka 22 tarik ha Mukroh hynrei kadei namar ka jingshah pyndik ha ki Pulit ka Assam Forest Guards kaba man ka por bad hadien ka jingjia ha Mukroh ki paidbah ki hap ban phet rieh sha pdeng shnong namar ka jingshep tieng ioh shah thombor ha kine ki Pulit ka Assam.
Naka liang u DGP u la kylli iaki paidbah, hato kila ju pynsngew ne em iaka jingeh jong ki sha ki MLA ne MDC, ki paidbah kila iathuh ba jan man ka por kila ud la nam hynrei kane ka jingud jong ki ka long leh noh ei.
La iathuh ba ki pynthor kba bad ki lyngkha kidei ki lad kamai jakpoh jong ki paidbah bas ah ha kine ki thain Mukroh bad Mokoilum bad ki nongrep ki donkam ban iaid jngai bha man ka sngi ban poi sha la ki pynthohr kba.
Hadien ka jingiakren bad ki paidbah naka liang u DGP u la iakren bad u SP ka West Jaintia Hills u Bikram D Marak bad u la bthah ia u SP bad udei ban pynbiang iaka kaiphod ba ki paidbah ki shem jingeh naka bynta iakren bad ka sorkar Assam.
Ha kane ka jingleit jurip ia kane ka thain, naka liang u U DGP ka Meghalaya Dr. LR Bishnoi u la kynduh ruh iaki longïng jong 5 ngut kiba la khlad bad u la leit ruh ban jurip iaka Mokoilum Police Outpost ha West Karbi Anglong ka jylla Assam ban iakren bad ki pulit.
