Nongpoh, Naiwieng 25 : Hadien ka rai jong ka Assam Petroleum Mazdoor Union ban sangeh pynpoi ia ka umphniang petrol/diesel sha Meghalaya namar ka jingbym sngewshngain na ka jingjia Mukroh, ki Pulit ka Ri-Bhoi District kila shim ia ka sienjam ban ai ia ka bor pahara ia ki tanker kit umphniang na Jorabat sha kylleng ki jaka jong ka Jylla.
Lah ban kdew hangne ba ka Assam Petroleum Mazdoor Union, kila pynpaw ia ka jingsheptieng ban wan kiew sha Jylla Meghalaya ban pynpoi ia ki umphniang petrol/diesel namar ka jingsngew bym sngain ban iaid lynti na ki National Highway ka Jylla hadien ka jingjia ha Mukroh. Kane ka seng kala dawa ruh ia ka Sorkar Meghalaya ban pynbiang ia ki bor pahara bad ban shim ia ka jingkitkhlieh lada jia eiei ia ki nongniah bad nongbud jong ki tanker kit umphniang.
Haba sakhi ia ka jingduna ka petrol/diesel ha Jylla bad ka jingieng lain jong ki kali ha man ki petrol pump, ka Tnad Pulit hynne ka sngi thohdieng kala shim ia ka sienjam ban ai ia ka bor pahara ia ki tanker kit umphniang naduh ka Jorabat sha kylleng ki jaka jong ka Ri-lum Khasi bad Jaintia.
Haba iakren bad ki nongthoh khubor, u Sanchet Surekha, Joint Secretary ka Petroleum Dealers Association ula ong b aka jingsangeh ban pynpoi petrol/diesel da ka Assam Petroleum Mazdoor Union ka dei ka namar ki jingiakhih kiba jia ha Jylla na ka jingshah siat iap ki 5 ngut ki riew paidbah ha Mukroh. U ong ba ki nongniah jong ki tanker ki sheptieng ban wan sha Jylla namar ioh mih kano kano ka jingjia thombor pyrshah ia ki ha ki National Highway.
Ula iathuh ruh ba hadien ba ka Tnad Pulit ka Meghalaya kila mynjur ban ai ia ka jingpahara, ka Union kala rai ban wan wan pynpoi biang noh ia ka umphniang sha Jylla ha kaba palat 40 tylli ki tanker kila wan rung sha Meghalaya ba pynpoi ia ka petrol/diesel.
U pyntip ba ka Union kala pynpaw ruh ia ka jingsngewnguh ia ki Pulit bad ka Sorkar Jylla kiba la shimkhia ia ka jingdawa jong ka Union ban pynbiang ia ka bor pahara.
