Shillong, Jymmang 15 : U Director General of Police (DGP) ka Jylla Lajja Ram Bishnoi ula leit buh da ka mudui ha ka Iingkashari Meghalaya High Court ban khein iap ia ka ejahar bala mudui da u Heh Pulit MPS ba shah sospon GK Iangrai, kaba long pyrshah ia u halor ka jingpyndonkam ia u nombor plate thok ha ka kali.
Kane kala jia tang da ki sngi hadien ba ka Tnad kam Pohiing (Police) kala bthah ban register case ia ka ejahar kaba la ujor hapoh ka Shillong Sadar Police Station.
La register ia kane ka case hapoh ka kyndon 409 (criminal breach of trust), 467 (forgery), 471 (using as genuine a fored document) bad 120 B (criminal conspiracy) jong ka Indian Penal Code (IPC) ha ryngkat ka kyndon 192 jong ka Motor Vehicle Act.
U DGP ha ka mudui ula kynnoh ba kane ka ejahar ka dei ka bym don nongrim bad ba dei ban shu kdat beit sharud bad ban khein iap ia ka.
Ula kam ba ka ejahar kam dei kaei kaei ruh hynrei tang ka jingpynhiar kput bad ka jingshun pyrshah ia u namar une u Heh Pulit ula shah sospon ha ka por jong u kum u DGP.
Ha ka 9 tarik Jymmang, u Assistant Inspector General (AIG) barim ka Tnad Pulit Bah GK iangrai ula ujor da ka ejahar pyrshah ia u DGP Lajja Ram Bishnoi halor ka jingkynnoh ba u pyndonkam bakla bad pyndait thok ia u nombor ha ka kali ba u pyndonkam.
Kane ka ejahar bala ujor ha Sadar Police Station, kala wan jia ruh ha khongdong shuwa ba un Bishnoi un shongthait noh na ka kam ha ka 19 tarik Jymmang.
U Bah Iangrai uba shah kem ha ka 2 tarik Naiwieng, 2022 halor ka jingkynnoh bam klop ia ka pisa bala mang ban tei ia ka Nationwide Emergency Response System (NERS) building in Shillong, ula dawa ruh ban leh eiei pyrshah ia ki dkhot jong ka Inquiry Committee halor kane ka kam.
Ha ka ejahar, une u AIG barim ula ong ba ka Enquiry Committee bala thung ha ka 18 tarik Naitung, 2022, ha ka kaiphod ba thoh ha ka para 1 jong ka sla 3 ka ong kumne. “Kawei ka Hyundai Verna kaba pynieng ha Central Workshop ka dei kaba la ai da u nombor thok bad ym shym la register ia kane ka kali da u AIG-A, naba ym don satia ki kot ki sla”.
U ong ba kane ka kaiphod ka paw kum kaba la pynkhreh na shuki kata kum ban shu ong la leh khlem da leit tohkit ha jaka bad wad jingtip ia ki kot ki sla bad ka Tnad Transport.
Kat kum ka shithi hapoh ka Right to Information Act (RTI) ba 27 tarik Naitung 2023 halor kane ka kali kata ka Verna 1.6 VTVT ka dei kaba la register bad ka Tnad Transport ka Sorkar Meghalaya, Shillong kum ka nombor ML-02-A-0001 ha ka kyrteng jong u Director General of Police, ka Sorkar Meghalaya.
“Kane ka jingtip ai hapoh ka RTI da ka Tnad Transport ka Sorkar Meghalaya ka pyniap ia ka kaiphod jong ka Inquiry Committee, kaba dawa ba dei ban leh eiei kat kum ka ain pyrshah ia ki dkhot jong ka Committee” ong u Bah Iangrai.
Nalor kata ha ka ejahar, une u AIG barim ula ong ba kawei pat ka bynta jong kane ka kam ka dei kaba thamla bha kumba ka paw na kine ki sakhi. “U Lajja Ram Bishnoi uba bat ia ka shuki jong u Director General of Police, Meghalaya, ula wan sha Shillong ban shimti ia kane ka kam ha ka 17 tarik Jymmang 2022 da ka kali Kia Carnival Limousine rong lieh, kaba don ia u registration ka Sorkar Assam hynrei hadien kane, la paw ba u Lajja Ram Bishnoi, lyngba ka buit kam bymman, ula pynkylla ia u nombor plate jong kane ka kali bad mynta ula buh da u nombor plate ba thymmai ML-02-A-0001, kaba dei ka nombor bala register ia ka Verna 1.6 VTVT”.
U ong ba la lap ruh ba kane ka Kia Carnival Limousine rong rieh ka dei ka kali ba u shim wai (requisition) na ka bynta ka kam kaba tip bha tang u Lajja Ram Bishnoi hynrei ula pyndonkam ia kane ka kali na ka bynta ki kam shimet, kumba kala paw na ki dur ba u shon ha ryngkat bad kane ka kali.
Une u AIG barim ula ong ba kat kum ka Rules and Standard Guidelines, u DGP ka Jylla Meghalaya, u don hok ban ioh ia ka kali kaba shongdor hapoh ka T. 12 lak katba ane ka kali (Kia Carnival Limoisine) ka shongdor haduh T. 40 lak, kaba u DGP, ka Sorkar Meghalaya um don hok ban ioh.
“Baroh kine ki jingshisha bala pynpaw hangne ki kdew beit thik ia ka jingleh ia ki buit kam bymman bad ka jingleh thok bad shukor d au Lajja Ram Bishnoi. Nga, kumta, nga kyrpad ia phi ban register case pyrshah ia u DGP hapoh ki kyndon kiba iahap bad ban tian bishar ia u khnang ba un ioh ia ka jingpynsajia halor kine ki kam ba ula leh” ong ka ejahar.
Dang khyndiat sngi, u Symbud Myntri Rangbah ba khmih ia ka Tnad Home (Police) Bah Prestone Tynsong ula ong ba ka ain hi kan iaid hala ka jong ka lynti haba iadei bad ka ejahar bala mudui pyrshah ia u DGP.
 ka Jylla Lajja Ram Bishnoi ula leit buh da ka mudui ha ka Iingkashari Meghalaya High Court ban khein iap ia ka ejahar bala mudui da u Heh Pulit MPS ba shah sospon GK Iangrai, kaba long pyrshah ia u halor ka jingpyndonkam ia u nombor plate thok ha ka kali.){kind=link}