Shillong, Naitung 13: U Myntri Rangbah ka Jylla Conrad K Sangma ha ka sngi Palei ula ong ba ka Sorkar Jylla kala kynriah ia ka jingpynleit jingmut ha ka jingtreikam ym shuh ban iaid lyngba ki skhim hynrei da ka jingbuh ia ka thong ban lah leh eiei halor ki jingtynjuh bad ki jingeh na ka bynta ka jingkiew shaphrang jong ka Jylla.
“Ka Sorkar jong ngi kala sdang ban khmih ia kiei kiei baroh da kaba lynti kaba pher bha, ym tang da ka jingpyn treikam ia ki skhim. Ngi la lum jingkhein ia ki jingktah jong ki skhim bad ki prokram jong ngi, haba ngi sngewthuh ba ka jingkylla ha ka jingmut jingpyrkhat bad ka lynti kaba ngi khmih ia ki jingeh da ka lynti kaba pher, kan pynthikna ba ngin lah leh eiei ia ki jingeh baroh” ula ong haba kren ha ka Meghalaya Education Symposium 2023, bala pynlong da ka Tnad Pule Puthi ka Sorkar Jylla.
“Ka jingkylla kaba khraw eh kaba donkam ha kane ka Jylla jong ngi, lane kino kino ki Jylla ruh, ka dei ka jingkylla ha ka jingmut jingpyrkhat, ka jingkylla ha ka jingmut jingpyrkhat ka dei kaba jingkylla ba kongsan tan ka ban pyntyllun bad ialam ia ka imlang sahlang jong ngi shakhmat” ula ban jur.
U Conrad ula kren ruh halor ka jingkongsan ban wanrah ia ka rukom treikam kaba iar ka ban kynthup ia ka pule ka dangle, ka koit ka khiah bad ka bha ka miat ha ka jingim ki Nongshongshnong, haba pynwandur ia kino kino ki prokram bad kino kino ki sienjam ka Sorkar ha ka kam pule dangle.
U Myntri Tangbah ula pynskhem ba ka pule dangle, ka koit ka khiah bad ka bha ka miat ki nongshongshnong kam dei ban kut tang ha ki skul. “Ka sdang naduh ba pun ia I Khunlung hakpoh haduh ba kot ka 1000 sngi, ka jinglong khynnah, samla lud bad long rangbah. Namar kata, ka jingtreikam da ka thong ka dei kaba ngi iaid mynta bad kane ka pyni ia ka jingkut jingmut jong ka Sorkar ban leh ia kiei kiei da kaba lynti kaba pher bha” ula ong.
“Ka Meghalaya Education Symposium 2023 kan long kum ka jingai sakhi ia ka jingkut jingmut jong ka Sorkar ban pynkylla thymmai ia ka kam pule dangle bad ban shim ia ki buit treikam ba thymmai” ula bynrap.
Haba kren halor ki rukom treikam jong ki snem bala leit noh, u Myntri Rangbah ula mynjur ba ka rai ba ju shim ha ka kam pule dangle ka ju tawiar beit thik tang ha ki riew sain pyrthei, ki Nonghikai bad ki Managing Committee ha ka jaka ban buh hakhmat eh ia ki samla pule. Ula ban jur ia ka jingdonkam ban pynbeit ia kane ka rukom iohi da kaba ong “Ngi klet ha ka lynti iaid jong ngi ba ki dei ki samla pule kaba pynlong ia ngi ban leh ia kine kiei kiei baroh, ba lehse ka dei hangne ba ngi la iaid bakla”.
U Myntri Rangbah ula pyntip ruh ba kum ka Sorkar Jylla, kala wanrah ia shibun ki kam ba thymmai ha kine ki khyndiat snem bala leit noh, ban pynbha bad pynbiang ia ki jingtei jong ki skul Sorkar ha baroh kawei ka Jylla. “Ka rai jong ngi ka dei kaba hap pynshong nongrim ia kaei kaba bha tam na ka bynta ki samla pule. Watla ki riewsain pyrthei, Nonghikai bad ki Managing Committee ki dei kiba kongsan, ngim dei pat ba klet ba ngi don hangne ban shakri ia ki samla pule” ula ong.
U Myntri Rangbah ula kular ba kano kano ka rai ban sa shim ha ka kam pule dangle kan dei kaban pynshong nongrim na kaei kaba bha tam ia ki Khun ki Kti.
Ka Meghalaya Education Symposium 2023, ka dei ka prokram bala pynlong da ka Tnad Pule Puthi ban rakhe ia ka jingdap 50 snem jong ka Meghalaya Board of School Education (MbOSE). Ha kane ka jingialang la iadonlang ruh ki kynrem ki lyndan ba kynthup ia u Myntri ka Pule Dangle Rakkam A Sangma bad ka Myntri ka Koit ka Khiah Kong Ampareen Lyngdoh.
Ha kane ka jingialang, u Myntri Rangbah ula pynkup burom ruh ia ki Toppers jong ka eksam SSLC bad HSSLC. U Swapnil Bhattacharya, UPSC CSE-2022-23 rank holder ula shah pynkup burom lang.
Pule ruh: Assam : Thalain tyngeh u Himanta Biswa ia ka Congress ba khlem kyrshan ia ka UCC
