Shillong, Naitung 26 : U wei u nongwad RTI ka jylla ha ka sngi Nyngkong u la phah tuklar ha u Lat ka Jylla, u Satya Pal Malik na ka bynta ban bthah ia ki ophis treikam jong ka sorkar pdeng kiba don ha Meghalaya ba kin pyntreikam ia ka bhah thungkam kaba long 44 persen kaba mang na ka bynta ki scheduled tribes jong ka jylla.
Ha ka shithi ba u phah sha u Lat, utei u rangbah ba tip kyrteng kum u Bah Arju Dkhar u la ong, “Nga kyrpad rit ba phin bthah na ka bynta baroh ba kin bud pyrkhing ia kane da baroh ki khlieh jong ki tnad bapher bapher jong ka sorkar jylla kiba don ia ki ophis bad ki tnad treikam,ki zonal office, regional office, ki ktem shipai, ki skulbah, ki PSU bad kiwei kiwei ba katkum ka office order jong ka Ministry of Personnel Public Grievances and Pensions Department of Personnel & Training…”
U Bah Dkhar u la ong ruh ba u la pan jingtip ruh katkum ka RTI Act 2005 ba katno persen ka don ka bhah thungkam thungjam na ka bynta ki nong Meghalaya kiba dei ki Scheduled Tribes ba kin ioh kam ha ki Group C bad D post kaba long katkum ka jinglait kam ha ki ophis jong ka sorkar pdeng.
U ong ruh ba katkum ka jubab ba u ioh na North Block New Delhi kaba dei ha u Lber 28, 2019, la kdew shai ba katkum ka khanasamari jong 2001, ki Scheduled Tribes jong ka Meghalaya ki don hok ban ioh ia ka bhah thungkam kaba long 44 persen ha ka Group C bad D kata katkum ka jinglait ki kam kaba treikam naduh ka 05tarik Naitung 2005 ha baroh ki ophis jong ka sorkar India, la ka long naduh ki shnat treikam, ki zonal office, ki regional office, ha tnad shipai bad kiwei kiwei.
Shuh shuh u la ong ruh ba katkum ka khubor ba la pynmih da kawei ka kotkhubor phareng ha ka Ri, kata ha ka 06tarik Risaw 2021, u Attorney General KK Venu Gopal bad u Additional Solicitor General Balbir Singh ki la phah ia ka jubab sha ka kynhun nongbishar Supreme Court ba kynthup ia u Justice L Najeswara Roa, Sanjiv Khanna bad BR Gaval, da kaba ong, “Hynrei u Venu Gopal u la pyntip ha Iing Bishar ba ha u snem 1965, ka jingdon ki SC bad ki nongtrei ha ki ophis sorkar pdeng ka long 3.34% bad 0.62% kaba la kiew mynta sha ka 17.5% bad 6.82%.
U ong ruh ba ka jingdon ki SC bad ST ka kham bun ha ka Groupd C bad D bad duna pat ha ka Group A&B.
U Attorney General la ong ba u pdiang ruh ba ka jingdon jong ki kattei kamut ba ka bhah jong ki ha ka sorkar pdeng ruh kadei ban iahap bad ka jingdon jong ki ha ka jingbun briew, bynrap biang u Bah Dkhar.
