Shillong, Risaw 29: U MP ka VPP na Shillong Dr Ricky AJ Syngkon ula phah da ka jingthoh sha u Myntri ka Ministry of Road Transport & Highways Nitin Gadkari bad ia u Myntri ka Environment, Forest and Climate Change Bhupender Yadav ba phah tuklar lem ia ka jingshah ktah jur ka Wah Umngot ia kaba ka tip ruh kum ka Wah Dawki na ka jingkynnoh ba kala don ka jingshna pynheh iaka surok Shillong-Tamabil ne ka Shillong-Tamabil Road Expansion Project.
Katkum ka jingong ka jongu, ia kane ka project la bei tyngka da ka Japan International Cooperation Agency (JICA) bad la pyntreikam da ka National Highways and Infrastructure Development Corporation Limited (NHIDCL), kala lam sha ka jingpyntuid ia ka khyndew bad ki maw kiba la tih, sha ka wah bad kane kala ktah jur bad pynjulor ia ka mariang.
Kane ka wah kaba shisien la tip kum ka wah kaba khuid tam ha dewbah Asia kala kylla ktieh, kaba la buh ha ka jingma ia ki trai shnong, kiba pyniaid ia ki kam kiba iadei bad ka kam jngohkai bad ki kynhun kiba iada ia ka mariang.
U Bah Syngkon ula kyntu ban shimkhia mardor ha ka ban leh eiei ia kane ka mat kaba kynthup ban pynsangeh noh ia ka jingot bad jingpyntwa ia ki lum bad ka jingpyntuid ia ka khyndew kaba la ktah jur ia ka wah bad ia ki wahduid.
Nalor kane, ula kyrpad ruh ban pynlong ia ka jingjurip lang da ka kynhun jong ka High Level kaban kynthup ia ki ophisar jongka Ministry of Road Transport and Highways, Ministry of Environment, Forest and Climate Change bad kiwei kiwei ki tnad kiba donbynta lang.
U MP ka VPP ula kyntu ia ka sorkar ban phah siew ia ka NHIDCL ia ka bai lutksan halor ka jingpynjulor ia ka mariang, kaban ia syriem kumba la leh da ka National Green Tribunal ha Uttarakhand, bad ban pynkhreh ia ka River Restoration and Rehabilitation Plan na ka bynta ki sawdong sawkun jongka Umngot.
Nalor kane, ula kyrpad ruh ban don ka jingpyn bahkhlieh pyrshah ia ki ophisar kiba donkti halor ka jingbym bud ryntih ia ki kyndon ban iada ia ka mariang.
Ka Wah Umngot ka kyrshan ia ki spah tylli ki longiing da ka jingkamai jakpoh lyngba ka kam jngohkai bad kane ka jingjaboh ka um kala pynlong ruh ia ki nongjngohkai ban sangeh noh ia ka jingleitkai kaba la buh pat ha ka jingma ia ka ioh ka kot jong ki trai nongshong shnong bad ia ka jingithuh ia ka jinglong jingman ka mariang hapoh Meghalaya.
