Shillong, Risaw 29 : Ka Kynhun Myntri ka Sorkar Jylla ha ka sngi Balang, kala ai jingmynjur ia ka por ban pynkhreh ia ka electoral roll na ka bynta ban pynlong ia ka elekshon sha ka Iingdorbar Garo Hills Autonomous District Council (GHADC), ka ban long ha u snem ban wan.
Haba kren sha ki lad pathai khubor hadien ka jingialang, u Myntri Sorkar bad nongaiktien ka Sorkar MDA Bah Wailadmiki Shylla ula pynbna ba ka Sorkar kala sdang ban trei ia ki kam, watla kam pat shym rai ia ka sngi ban pynlong ia ka elekshon.
Ula batai ba ka Sorkar ka donkam ban sdang noh ia ka jingpynkhreh pynkhrum ban pynthikna ia ka jingdon ka electoral roll hashuwa ka elekshon.
Ka Kynhun Myntri kala mynjur ia ka por ban pynkhreh ia ka electoral roll, kaba kynthup ia ka jingpynmih ia ka draft electoral roll, ka jingkam kyrteng bad jingpyrshah, bad ka jingrai khatduh ia ki kyrteng ha ka electoral roll, ula ong.
Halor ki jingsngewkhia ba ioh iashimbynta ki nongthep vote bar jylla ha ka elekshon GHADC, u Commissioner & Secretary Bah CVD Diengdoh ula pynshai ba u Deputy Commissioner un bud kat kum ka Autonomous District Rules, kaba don ia ki kyndon kiba shai ia ka jingioh thep vote.
U Bah Diengdoh ula ban jur ba ia ka elekshon yn pyniaid kat kum ki rules.
, ka ban long ha u snem ban wan.){kind=link}