Shillong, Jymmang 20: Ka Mawmluh Cherra Cements Employees Union (MCCEU) kala kyrpad ia u Myntri Rangbah ka Jylla Conrad K Sangma ba un tuklar kham kloi ha kaban lah pyniaid biang kumba ju long ia ka karkhana pynmih dewbilat bad ban pyntreikam ia ki skhim ki ban weng ia ki jingeh jong ki nongtrei.
Haba kren sha ki nongthoh khubor hadien ka jingialang, u President ka MCCEU Shanlang Diengdoh ula ong ba u Myntri Rangbah ula kular ban sa shong bishar ia ki jingdawa bad un sa ai jingtip ia ka Union ha kine ki khyndiat sngi ban wan.
“Ha ka jingialang, ngi la ban jur ia ka jingdonkam ia ka Sorkar ban pyntrei kloi noh ia baroh ki jingdawa jong ngi khnang ban weng noh ia ki jingeh bala mad la slem da ki nongtrei ka MCCL kynthup kito kiba dang don ha ka kam bad kumjuh ruh kiba la shongthait na ka kam” ula ong.
Ula pyntip ba ka jingdawa ka long ban kynthup ia ka jingsiew tulop kumba ju siew bad kipisa kiba dei ban siew tad haduh bala lah pyntreikam biang ia ka karkhana, ban pynkloi ha kaban pyniaid kam ia ka karkhana ryngkat ka jingpynheh nalor ka skhim VRS/Golden Handshake.
Kane ka jingdawa kala mih ruh ha ka por ba ka Sorkar Jylla kala thmu ban shim ia ka rai la kan khang khyrdep noh ne em ia ka karkhana hapoh kine ki hynriew bnai ban wan.
Kat kum ka jingong u Bah Shanlang, kane ka mat kam pat don ha ka jingiakren hynrei la ban jur ba dei ban mynjur bad pyntreikam shuwa ia ki jingdawa ki nongtrei.
U Bah Shanlang ula ong ba ka kynhun kala kyrpad ruh ia ka Sorkar Jylla ba kan pynkiew ia ka song jingiarap pisa khnang ban pynsting ia ka jingeh bala mad da ki nongtrei bad ki bahaiing hasem.
Halor ka jingdawa ia ka VRS bad golden handshake scheme, ula ong ba kane ka skhim ka ban sa pyntreikam ka dei ban long na ka bynta kito ki nongtrei kiba la trei 10 snem ne palat kaba rit duh.
 kala kyrpad ia u Myntri Rangbah ka Jylla Conrad K Sangma ba un tuklar kham kloi ha kaban lah pyniaid biang kumba ju long ia ka karkhana pynmih dewbilat bad ban pyntreikam ia ki skhim ki ban weng ia ki jingeh jong ki nongtrei.){kind=link}