Phah tohkit ka Iingkashari ia ka bynta ki Pulit halor ka kam tih/khaii dewiong be-ain, bad Karkhana Coke be-ain

Shillong, Jylliew 28 : Ka Iingkashari Meghalaya High Court ha ka sngi Ba-ar, kala bthah ban tohkit ia ki briew kiba donkti ha ka jingiatih bad khaii dewiong be-ain bad ka jingpyniaid ia ki kakhana coke ba be-ain haba iadei bad ka bynta (role) jong ki Pulit ka Jylla.

Ha ka hukum, ka Full Bench bala khlieh da u Chief Justice Sanjib Banerjee kalaong “Naba ha ka suo moto proceeding jong ka jingpyntreikam ia ki hukum bala pynmih da ka National Green Tribunal bala pynskhem da ka Iingkashari Supreme Court, u Justice BP Katakey (retired) ula shah thung ban pynthikna ba ka jingdie ia u dewiong bala dep tih (shuwa ban khang) bad ka jingpyntreikam ia ki hukum, la aibor shuh shuh ia u Justice Katakey ban tohkit ia ki briew ba donkti ha lyndet ka jingpyntrei be-ain ia ki par dewiong bad khaii ia u dewiong nalor ka jingpyntrei be-ain ia ki karkhana coke, kynthup ka jingshim ia une u dewiong ha kine ki karkhana”.

“Ha kane ka jingtohkit, ia ki jingleh tam pud bad jingleh bakla da ki briew kiba don ha ka bor, khamtam ki Heh Pulit, kynthup, lehse, u Officer-in-charge ka Shallang, lah ruh ban bthah ba hap ban khmih lang ia kane ka bynta” kala bynrap.

Ka Iingkashari kala pynmih ia kane ka hukum haba shong bishar ia ka PIL bala mudui da u Monu Kumar pyrshah ia ki karkhana coke ba be-ain kiba don hapoh ka Jylla.

Ka hukum ka ong ba u nongmudui ula pan katto katne por naba ha ka jingkylli u Nongmudui la shem ba ki don bun ki karkhana coke kiba la shah ban treikam, khamtam ha West Khasi Hills District khlem kano kano ka licence lane ka jingai jingbit.

Ka ong ba ki don ruh kiwei ki bynta ba hap ban khmih haba bynrap ba naba u Nongmudui ula pynpaw ha kane ka jingbishar ba ki dewiong ba tih be-ain kila poi sha ki karkhana coke bad ruh ki karkhana kiba treikam be-ain, u nongmudui u lah ban pynshisha ia ka bynta jong ki katto katne ki Heh Pulit khamtam ha Shallang bad hato ki trok ba kit ia ki dewiong ba tih be-ain, kila poi sha ki karhana coke kaba long be-ain.

Ka Iingkashari kala buh ban bishar biang ia kane ka kam ha ka 3 tarik u Naitung.